كاسىپورىننىڭ ماقساتى – قولجەتىمدى، جوعارى ساپالى جانە سەنىمدى تەحنيكا شىعارۋ.
كوكشەتاۋ قالاسىندا اۋىل شارۋاشىلىعى اگرەگاتتارى مەن قۇرالدارىن شىعاراتىن “قازاگروماش” زاۋىتى پايدالانۋعا بەرىلەدى، دەپ حابارلايدى Almaty-akshamy.kz
جاڭا ماشينا جاساۋ كاسىپورنىنىڭ 2024 جىلعى ناۋرىزداعى وندىرىستىك قۋاتى جىلىنا 150 بىرلىك اۋىل شارۋاشىلىعى قۇرالىن قۇرايدى.
زاۋىت ماماندارى ءقازىردىڭ وزىندە وندىرىستىك جەلىلەرىن جولعا قويىپ، التى ءتۇرلى قۇرال-سايمان شىعارۋدى يگەردى.
زاۋىتتا مىناداي تەحنيكالار شىعارىلادى:
جالپاق كەسكىشتەر؛
تەگىستەگىشتەر؛
سوقالار؛
قار جيناعىشتار؛
ديسكىلى تىرمالار مەن تىركەمەلەر.
13 جىل تاجىريبەسى بار كاسىپورىننىڭ ماقساتى – قازاقستاندىق اگرارلىق سالا ماماندارى ءۇشىن قولجەتىمدى، جوعارى ساپالى جانە سەنىمدى تەحنيكا شىعارۋ. ءالى سالىنىپ جاتقان زاۋىتتىڭ سەحتارىنداعى العاشقى قۇرال-سايمانداردىڭ ازىرلەمەسى 2023 جىلدىڭ باسىندا باستالدى، ال تەحنيكا 2023 جىلدىڭ ماۋسىمىندا العاشقى سىناقتان ءوتتى، سودان كەيىن ساتىلىمعا شىعارىلدى.