ەلىمىزدە استروحاب قۇرىلادى

قازاقستان IAWN استەرويد ءقاۋپىن الدىن الۋدىڭ حالىقارالىق ۇيىمىنا مۇشە بولدى.

بىرىككەن ۇلتتار ۇيىمىنىڭ باستاماسىمەن جۇمىس ىستەيتىن مەكەمە ءارتۇرلى ەلدەردىڭ عىلىمي توپتارىن بىرىكتىرەدى، دەپ حابارلايدى Almaty-akshamy.kz 24.kz-كە سىلتەمە جاساپ.

قازاقستان اسى-تۇرگەن ۇستىرتىندەگى وبسەرۆاتورياعا شوس-400 كەڭبۇرىشتى جاڭا تەلەسكوپتى ورناتقان سوڭ وسى ۇيىمعا مۇشە بولۋعا مۇمكىندىك الدى. كولەمى شاعىن، ءبىراق زاماناۋي قۇرال قازاقستاندىق استروفيزيكتەرگە بىرنەشە جاڭا عىلىمي باعدارلامانى قاتار الىپ جۇرۋگە مۇمكىندىك بەرەدى. ءبىرىنشى مىندەتى، جاقىن عارىشتى باقىلاپ، جەرگە تاياپ كەلە جاتقان اسپان دەنەلەرىن تابادى. عارىشتاعى نىسانداردى زەرتتەۋ چەليابى مەتەوريتىنەن كەيىن وزەكتى بولا ءتۇستى. ەكىنشى باعىتى – عارىشتاعى قوقىستاردىڭ وربيتالىق سپۋتنيكتەرمەن سوقتىعىسپاۋىن قاداعالاۋ. تەلەسكوپتى ينتەرنەت-حاتتامالار ارقىلى قاشىقتان باسقارۋعا بولادى. بۇل عىلىمي جوبالاردىڭ حالىقارالىق ماڭىزدىلىعىن كۇشەيتە تۇسەدى.   

«مۇنداي مالىمەتتەرگە اۋەلى «قازاقستان عارىش ساپارى» كومپانياسى تاپسىرىس بەرەدى دەپ ويلايمىن. سەبەبى ولار – جەردى قاشىقتان زەرتتەيتىن تومەنگى وربيتادا ۇشاتىن ءبىزدىڭ سپۋتنيكتەردىڭ نەگىزگى وپەراتورى. ءقازىر تومەنگى وربيتادا مىڭداعان سپۋتنيك بار. سوندىقتان وزگە مەملەكەتتەردىڭ وپەراتورلارى دا ءبىزدىڭ قىزمەتىمىزگە جۇگىنەدى دەپ جوسپارلاپ وتىرمىز»، - دەيدى  ۆ.گ. فەسەنكوۆ اتىنداعى استروفيزيكالىق ينستيتۋتتىڭ ديرەكتورى شىڭعىس وماروۆ.