ءبىلىم سالاسىنداعى رەفورمالار جالعاسۋدا: سقۋ بازاسىندا اريزونا ۋنيۆەرسيتەتىنىڭ فيليالىن اشۋ جوسپارلانىپ وتىر
ق ر ءبىلىم جانە عىلىم ۆيسە-مينيسترى قۋانىش ەرعالييەۆ اريزونا ۋنيۆەرسيتەتىنىڭ پرەزيدەنتى دوكتور ر. روببينسپەن جانە اقش-تىڭ اريزونا شتاتىنداعى وكىلدەر پالاتاسىنىڭ سپيكەرى ر.باۋەرسپەن ونلاين-كەزدەسۋ وتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ
بۇل جاڭالىقتى اتالعان ۆەدومستۆونىڭ باسپا ءسوز قىزمەتى حابارلاعان.
كۇن تارتىبىندە ستراتەگيالىق سەرىكتەستىك جانە قوزىبايەۆ اتىنداعى سقۋ بازاسىندا اريزونا ۋنيۆەرسيتەتىنىڭ فيليالىن اشۋ ماسەلەلەرى تالقىلاندى. ەستەرىڭىزگە سالا كەتەيىك، وسىعان دەيىن پرەزيدەنت قاسىم-جومارت توقايەۆ شەتەلدىك جوعارى وقۋ ورىندارىنىڭ فيليالدارىن اشۋ بويىنشا جۇمىس جۇرگىزۋدى تاپسىرعان بولاتىن.
كەزدەسۋ بارىسىندا تاراپتار جوبانى جان-جاقتى قولداۋعا دايىن ەكەنىن مالىمدەدى جانە ءبىلىم بەرۋ ساپاسىن ارتتىرۋداعى ستراتەگيالىق سەرىكتەستىكتىڭ ماڭىزدىلىعىن اتاپ ءوتتى. ۆيسە-مينيستر ق. ەرعالييەۆ اتالعان جوبانى ىسكە اسىرۋ ءۇشىن نورماتيۆتىك-قۇقىقتىق قۇجاتتاردا قابىلدانعان وزگەرىستەر تۋرالى ايتىپ بەردى. تاراپتار ءبىلىم بەرۋ قىزمەتىن جۇزەگە اسىرۋ، وقىتۋشىلىق قىزمەتكە شەتەلدىك عالىمداردى تارتۋ ءتارتىبىن جانە ليسەنزيالاۋ ماسەلەلەرىن تالقىلادى.
ءبىلىم سالاسى، IT، ينجەنەريا، اگرو-تەحنيكالىق جانە ت. ب. باعىتتار بويىنشا وقىتۋ اقش-تا اككرەديتتەلگەن ءبىلىم بەرۋ باعدارلامالارى بويىنشا اعىلشىن تىلىندە جۇرگىزىلەدى دەگەن ۋاعدالاستىق بار. نەگىزگى باسىمدىق قوسديپلومدى باعدارلامالار مەن بىرلەسكەن عىلىمي زەرتتەۋلەردى دامىتۋعا بەرىلىپ وتىر.
سونداي-اق حالىقارالىق پروفەسسورلار مەن بيزنەس-قاۋىمداستىق وكىلدەرى جۇمىلدىرىلادى. ەندى 2022 جىلدىڭ قىركۇيەگىنەن باستاپ اريزونا ۋنيۆەرسيتەتىمەن بىرلەسكەن جۇمىستى باستاۋ ءۇشىن ستراتەگيالىق ىنتىماقتاستىقتى بەكىتەتىن نورماتيۆتىك قۇقىقتىق قۇجاتتى قابىلداۋ كەرەك. ەلىمىزدە شەتەلدىك وقۋ ورىندارىنىڭ كامپۋستارىن اشۋ ستۋدەنتتەردىڭ سىرتقا كەتۋىن ازايتىپ، قازاقستاندىق جوعارى ءبىلىم جۇيەسىنە الەمدىك ستاندارتتار مەن جاڭا ادىستەمەلەر ەنگىزۋگە مۇمكىندىك بەرەدى. وتاندىق وقۋ ورىندارى اراسىنداعى باسەكەلەستىك ارتادى.
ەستەرىڭىزگە سالا كەتەيىك، ءبىلىم جانە عىلىم مينيسترلىگى، م.قوزىبايەۆ اتىنداعى سولتۇستىك قازاقستان ۋنيۆەرسيتەتى مەن اريزونا ۋنيۆەرسيتەتتەرى اراسىنداعى ىنتىماقتاستىق جونىندەگى مەموراندۋمعا 2021 جىلى قول قويىلعان بولاتىن.