الەمدە ەڭ كوپ تاراعان دەرتتىڭ ءبىرى - جۇرەك-قان تامىرلارى اۋرۋى
بۇل تۋرالى كارديولوگيا جانە ىشكى اۋرۋلار عىلىمي-زەرتتەۋ ينستيتۋتى (عزي) جوعارى ساناتتى كارديولوگ دارىگەرى جۇلدىزاي ەگەمبايەۆا ايتتى، دەپ حابارلايدى Almaty-akshamy.kz.
ونىڭ ايتۋىنشا، جىل سايىن الەمدە 20 ملن-عا جۋىق ادام جۇرەك-قان تامىرلارى اۋرۋلارىنان كوز جۇمادى. بۇل بەيجىڭ، شانحاي، توكيو، دەلي سياقتى ءىرى مەگاپوليستىڭ حالقىمەن تەڭ. قازاقستانداعى جۇرەك-قان تارمىرلارى اۋرۋلارىنا كەلەر بولساق، جاعداي ءماز ەمەس.
«قازاقستاندا ءاربىر 33ء-شى تۇرعىندا قان اينالىم جۇيەسى اۋرۋلارىنىڭ سيمپتومدارى، ءاربىر 12ء-شى تۇرعىندا جوعارى قان قىسىمىنىڭ كلينيكالىق سيمپتومدارى بار. 19 ميلليوننان 1،5 ملن ادام ارتەريالىق گيپەرتونيا بويىنشا ەسەپتە تۇر. جۇرەكتىڭ يشەميالىق اۋرۋى جانە گيپەرتونيانىڭ ۇلەسىنە قان اينالىمى جۇيەسىنىڭ بارلىق بۇزىلىستارىنىڭ 60%-ى تيەسىلى»،- دەيدى جۇلدىزاي ەگەمبايەۆا .
دۇنيەجۇزىلىك جۇرەك فەدەراسياسىنىڭ مالىمەتتەرى بويىنشا، ەگەر سالاۋاتتى ءومىر سالتىن ۇستانىپ، تەمەكى شەگۋ، تاماقتانۋ جانە دەنە قيمىلىنىڭ بەلسەندىلىگى باقىلاناتىن بولسا، ينفاركت پەن ينسۋلتتان بولاتىن مەزگىلسىز ءولىمنىڭ 80%-نىڭ الدىن الۋعا بولادى.
جۇرەك-قان تامىرلارى اۋرۋلارىنا شالدىققان نەمەسە جوعارى قان قىسىمى، قانت ديابەتى، گيپەرليپيدەميا نەمەسە دامىپ كەلە جاتقان اۋرۋ بولعان جاعدايدا مۇنداي اۋرۋلاردىڭ ءقاۋپى جوعارى ادامدار ەرتە انىقتاۋدى جانە كەڭەس بەرۋ ارقىلى، قاجەت بولعان جاعدايدا دارى-دارمەكتەردى قابىلداۋدى قاجەت ەتەدى.
«سوڭعى جىلدارى جۇرەك-قان تامىرلارى اۋرۋلارىنىڭ، ونىڭ ىشىندە ەڭبەككە قابىلەتتى جاستاعى ەرلەر مەن ايەلدەر اراسىندا ميوكارد ينفاركتىسىنىڭ «جاسارۋىنىڭ» تۇراقتى ءۇردىسى بايقالىپ وتىر»، - دەيدى كارديولوگ.
دارىگەردىڭ سوزىنشە، زاماناۋي دياگنوستيكانىڭ دەڭگەيى پاتولوگيالىق پروسەسس قايتىمدى جانە ەمدەلۋگە كەلەتىن جۇرەك-قانتامىر جۇيەسىنىڭ كوپتەگەن اۋرۋلارىن ەرتە كەزەڭدە انىقتاۋعا مۇمكىندىك بەرەدى.