قازاقستان رەسپۋبليكاسىنىڭ سانيتاريالىق-ەپيدەميولوگيالىق قىزمەتى دەلي-الماتى باعىتى بويىنشا Air Astana اۆياكومپانياسى رەيسىنىڭ بورتىندا تىرىسقاق اۋرۋىن تىركەدى.
اۋرۋدىڭ وشاعى ءساتتى جويىلدى، دەپ حابارلايدى Almaty-akshamy.kz.
سانيتاريالىق-ەپيدەميولوگيالىق قىزمەت ماماندارىنىڭ جەدەل ءىس-قيمىلدارى ەل ىشىندە تىرىسقاقتىڭ تارالۋىن بولدىرماي، ينفەكسيانى ۋاقتىلى انىقتاۋعا جانە وقشاۋلاۋعا مۇمكىندىك بەردى.
«بايلانىستا بولعان ادامداردىڭ زەرتحانالىق زەرتتەۋلەرىنىڭ ناتيجەلەرى — تەرىس، 154 ادامنان مەديسينالىق باقىلاۋ الىنىپ تاستالدى. سىرقاتتانعان قىرعىز رەسپۋبليكاسىنىڭ ازاماتى ەمدەلۋدەن ءساتتى ءوتىپ، جاقسى ناتيجەمەن ستاسيوناردان شىعارىلدى. قازىرگى ۋاقىتتا ول بىشكەك قالاسىنا كەتتى. حالىققا، اسىرەسە ءۇندىستان، اۋعانستان مەن پاكىستان سەكىلدى ەلدەردى قوسا العاندا، تىرىسقاقپەن سىرقاتتانۋشىلىق جوعارى افريكا مەن ازيانىڭ كەيبىر وڭىرلەرىنە ساپارلاۋدى جوسپارلاپ وتىرعان ادامدارعا ۇسىنىم بەرۋ ماڭىزدى»، — دەلىنگەن حابارلامادا.