ەلىمىزدە اڭشى كۋالىگىن جىل سايىن تىركەۋ ءتارتىبىن بەلگىلەۋ ۇسىنىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بارىمىزگە بەلگىلى، اڭشىلاردىڭ كوپشىلىگى ينتەرنەت جەلىسى دامىماعان اۋىلدىق جەرلەردە تۇراتىندىقتان، «ەلەكتروندىق ۇكىمەت» ۆەب-پورتالى ارقىلى مەملەكەتتىك قىزمەتتى الۋعا مۇمكىندىكتەرى جوق. ازاماتتارعا اڭشى كۋالىگىن بەرۋ كەزىندە تۋىندايتىن اتالعان قولايسىزدىقتار ءىس جۇزىندە مەملەكەتتىك قىزمەتتىڭ نەگىزىنە قايشى كەلەدى. ق ر ەكولوگيا جانە تابيعي رەسۋرستار مينيسترلىگى مەملەكەتتىك كورسەتىلەتىن قىزمەتتەر ستاندارتىندا ەلەكتروندىق نىسانمەن قاتار قىزمەت الۋشىنىڭ قالاۋى بويىنشا تۇپتەلگەن قاتتى قاعاز تۇرىندە قۇجات بەرۋدى كوزدەگەن. ياعني ينتەرنەت بولماعان جاعدايدى اڭشى قۇجاتتى قاعاز تۇرىندە الۋىنا بولادى»، - دەدى ق ر پارلامەنتى ءماجىلىسىنىڭ دەپۋتاتى ءامىرحان راحىمجانوۆ ءماجىلىستىڭ جالپى وتىرىسىندا دەپۋتاتتىق ساۋال جاساي وتىرىپ.
ونىڭ ايتۋىنشا، اڭشى كۋالىگىن تەك ەلەكتروندى تۇردە بەرۋ ينتەرنەت جوق دالالىق جانە تاۋلى جەرلەردەگى اڭ اۋلاۋ پروسەسىن باقىلاۋعا كەدەرگى كەلتىرەدى.
«ءقازىر اڭشىلىق شارۋاشىلىعىنىڭ باقىلاۋشىلارى مەن قورىقشىلارى اڭشى كۋالىگىنىڭ ەلەكتروندىق نىسانىنىڭ ءتۇپنۇسقالىعىن تەكسەرۋگە ارنالعان ارنايى قۇرالدارمەن (پلانشەتتەر، سكانەرلەر) قامتىلماعان»، - دەيدى ول.
سونداي-اق، حالىق قالاۋلىسى اۋىلدىق ەلدىمەكەندەر تولىق ينتەرنەتپەن قامتىلعانشا اڭشى كۋالىگىن قاعاز تۇرىندە بەرۋدى قالدىرۋ كەرەكتىگىن ايتىپ وتىر.
«قولدانىستاعى نورمالار مەن جۇيەلەر جاڭا كوزقاراسپەن قاراۋدى تالاپ ەتەدى. وسىعان بايلانىستى، بەرىلگەن اڭشى كۋالىكتەرىن جىل سايىن تىركەۋ ءتارتىبىن بەلگىلەۋ قاجەت دەپ سانايمىز. بۇل جالعان جانە زاڭسىز پايدالانىلاتىن اڭشى كۋالىكتەرىن انىقتاۋعا، بۇل تۋرالى قۇقىق قورعاۋ ورگاندارىن ۋاقتىلى حاباردار ەتۋگە مۇمكىندىك بەرەدى. انىقتالعان مالىمەتتەر قۇقىق قورعاۋ ورگاندارىنىڭ ارنايى تەكسەرۋىنىڭ نىسانى بولۋى مۇمكىن. سونداي-اق، بۇل شارا ازاماتتار يەلەنگەن جانە اڭ اۋلاۋدا پايدالانىلاتىن اتىس قارۋىنىڭ سانىن باقىلاۋدىڭ ماڭىزدى ەلەمەنتتەرىنىڭ ءبىرى. سونىمەن قوسا رەسپۋبليكادا اڭ اۋلاۋ مەن جانۋارلار دۇنيەسىن ورنىقتى پايدالانۋدى رەتتەۋدىڭ ءتيىمدى تەتىگى»، - دەيدى ول.