بۇگىن قمدب ءتوراعاسى، باس ءمۇفتي ناۋرىزباي قاجى تاعان ۇلى ۆاتيكان مەن كاتوليك شىركەۋىنىڭ باسشىسى ريم پاپاسى فرانسيسكپەن كەزدەستى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
كەزدەسۋدە ءوزارا سەنىم مەن سىي-قۇرمەت، كونفەسسياارالىق كەلىسىم مەن ءدىنارالىق ديالوگتىڭ ىنتىماقتاستىققا دەم بەرەتىنى ايتىلدى. سونداي-اق ەلوردادا ءوتىپ جاتقان سەزدىڭ ءدىنارالىق دوستىقتى نىعايتۋداعى ءرولى ءسوز بولدى.
ريم پاپاسى فرانسيسك بەيبىتشىلىك پەن ءوزارا تۇسىنىستىككە شاقىراتىن باستامالاردىڭ، سونىڭ ىشىندە قازاقستاندا ءوتىپ جاتقان الەمدىك جانە ءداستۇرلى دىندەر كوشباسشىلارى سەزىنىڭ الەمدى بىرلىككە شاقىرۋداعى ورنى جوعارى ەكەنىن اتاپ ءوتتى.
ايتا كەتەيىك، بۇگىن ەلورداداعى تاۋەلسىزدىك سارايىندا الەمدىك جانە ءداستۇرلى دىندەر كوشباسشىلارىنىڭ VII سەزى باستالدى. القالى جيىنعا قازاقستان پرەزيدەنتى قاسىم-جومارت توقايەۆ قاتىسىپ، قازاقستان ءۇشىن الەمنىڭ ەڭ قۇرمەتتى رۋحاني كوشباسشىلارىن بىرگە جيناپ، ديالوگ ورناتۋ ۇلكەن قۇرمەت ەكەنىن اتاپ ءوتتى.
