قازاقستان ۇلتتىق بانكى الاياقتاردىڭ كوبەيگەنىن ەسكەرتەدى

الدانباس ءۇشىن قۇقىق قورعاۋ ورگاندارىنا حابارلاسقانى ءجون.

قازاقستاننىڭ ۇلتتىق بانك ماماندارى مەملەكەت ازاماتتارى الاياقتارعا الدانىپ قالماس ءۇشىن ەسكەرتۋ جاريالاپ جاتىر، دەپ حابارلايدى Almaty-akshamy.kz. 

مامانداردىڭ ايتۋىنشا، قازاقستاننىڭ ۇلتتىق بانكۋ جەكە تۇلعالارعا قىزمەت كورسەتپەيدى جانە حالىقپەن قولما-قول ەسەپ ايىرىسپايدى. 

«ۇلتتىق بانك قازاقستاندىقتارعا الاياقتىق ارەكەتتەردىڭ قارقىن العانىن ەسكەرتەدى. وزدەرىن «پوليسيا قىزمەتكەرى» نەمەسە «ۇلتتىق بانك قىزمەتكەرى» دەپ تانىستىراتىن الاياقتار ازاماتتاردى الداپ، نەسيە، ميكروزايم راسىمدەۋگە، سونداي-اق ءۇشىنشى تۇلعالارعا اقشا اۋدارۋعا اربايدى»،- دەلىنگەن بانك باسپا ءسوز قىزمەتىنىڭ حابارلاماسىندا. 

مۇنداي سحەمالار الاياقتاردى ۇستاۋ ماقساتىندا بانكتىك «ناۋقان» دەگەن سىلتاۋمەن جۇزەگە اسىرىلۋى مۇمكىن. بۇل رەتتە ىس-ارەكەتتەرىنىڭ زاڭدىلىعىن راستاماق بولىپ «ۇلتتىق بانكتىڭ جالعان قىزمەتكەرىنە» قوڭىراۋ شالعان بولادى، قىزمەتكەردىڭ جالعان كۋالىگىن دە كورسەتەدى. 

الاياقتىق ادىستەردىڭ تاعى ءبىر ءتۇرى – ۇلتتىق بانك ازىرلەگەن جەكە ينۆەستيسيالىق باعدارلامالار دەپ اتالادى. مۇنداي ونلاين-پلاتفورمالاردا ينۆەستيسيالار، جالعان ليسەنزيالار جانە قۇقىق بەلگىلەيتىن قۇجاتتار تۋرالى جالعان اقپارات ورنالاستىرىلعان.

وسىعان بايلانىستى ۇلتتىق بانك «قۇقىق قورعاۋ جۇيەسىنىڭ» نەمەسە «ۇلتتىق بانكتىڭ جالعان قىزمەتكەرلەرىنەن» قوڭىراۋ تۇسكەن كەزدە لەزدە اڭگىمەنى ءۇزىپ، الاياقتار ويلاپ تاپقان «وپەراسيالاردى» جۇرگىزۋگە قاتىسپاۋ كەرەك ەكەنىن ەسكەرتەدى. وسىنداي زاڭسىز ارەكەتتەردەن زارداپ شەككەن ازاماتتار دەرەۋ قۇقىق قورعاۋ ورگاندارىنا حابارلاسقانى ءجون.

سونداي-اق، ۇلتتىق بانك ءموبيلدى قوسىمشالاردى ورناتپاۋ كەرەك ەكەنىن، جەكە دەرەكتەردى جاريالاماۋدى، AnyDesk، Team Viewer سەكىلدى سمارتفوندى قاشىقتان باسقاراتىن قىزمەتتەردەن ساق بولۋدى سۇرايدى. قانداي جاعدايدا بولماسىن، تەلەفون ارقىلى بەرىلگەن نۇسقاۋلاردى ورىنداۋدان ساقتانىپ، ءۇشىنشى تاراپتىڭ ەسەپشوتىنا اقشا اۋدارماۋ كەرەك، سەبەبى مۇنداي اۋدارىمداردى قايتارۋ نەمەسە ونى داۋلاۋ وتە قيىن.

«كەڭەس الۋ ءۇشىن 1477 قىسقا ءنومىرى بويىنشا ۇلتتىق بانكتىڭ بايلانىس ورتالىعىنا حابارلاسۋعا بولادى، ۇلتتىق بانكتىڭ نەگىزگى قىزمەتىمەن nationalbank.kz رەسمي سايتىندا تانىسۋعا بولادى»،-دەلىنگەن حابارلامادا.