ەلىمىزدە العاش رەت روبوتتار فەستيۆالى ءوتىپ جاتىر

وعان ەلىمىزدىڭ ءار وڭىرىندەگى مامانداندىرىلعان مەكتەپتەردەن 159 وقۋشى قاتىسۋدا.

فەستيۆال 10-11 قاڭتاردا الماتى وبلىسى قاسكەلەڭ قالاسىنداعى سۇلەيمەن دەميرەل اتىنداعى ۋنيۆەرسيتەتتە وتەدى، دەپ حابارلايدى Almaty-akshamy.kz وقۋ-اعارتۋ مينيسترلىگى باسپا ءسوز قىزمەتىنە سىلتەمە جاساپ.

فەستيۆال حالىقارالىق FIRST ەرەجەلەرى بويىنشا ەكى باعىتتا وتەدى. ءبىرىنشى باعىت – FIRST LEGO League Challenge، وعان 10-16 جاس ارالىعىنداعى وقۋشىلار قاتىسا الادى. ەكىنشى باعىت – FIRST Tech Challenge. وندا 12-18 جاس ارالىعىنداعى وقۋشىلار ب ا ق سىناسادى.

«وقۋشىلارىمىزدىڭ اراسىندا روبوتوتەحنيكا تانىمال بولىپ كەلەدى. سوڭعى ءۇش جىلدا 3 مىڭنان اسا روبوتوتەحنيكا كابينەتى اشىلدى. سونداي-اق قازاقستاندىق وقۋشىلار روبوتوتەحنيكادان حالىقارالىق جارىستاردا ۇزدىك ناتيجە كورسەتىپ كەلەدى. مىسالى، قازان ايىندا وقۋشىلارىمىز جەنيەۆادا وتكەن روبوتوتەحنيكادان FIRST GLOBAL CHALLENGE الەم جارىسىندا جەڭىسكە جەتتى. كەيىن شىمكەنتتىك وقۋشىلار دورتمۋند قالاسىندا وتكەن روبوتوتەحنيكادان حالىقارالىق وليمپيادادا العاش رەت ەكىنشى ورىندى يەلەندى. بۇل جەڭىستىڭ بارلىعى – ءبىزدىڭ دۇرىس باعىتتا جۇمىس ىستەپ جاتقانىمىزدىڭ دالەلى. روبوتوتەحنيكانى دامىتۋ جانە تانىمال ەتۋ ءۇشىن «USTEM Robotics» قوعامدىق قورىمەن بىرلەسىپ، مامانداندىرىلعان ءبىلىم بەرۋ ۇيىمدارىنىڭ وقۋشىلارى اراسىندا العاش رەت رەسپۋبليكالىق روبوتتار فەستيۆالىن وتكىزىپ وتىرمىز. جارىس جەڭىمپازدارى روبوتوتەحنيكادان قازاقستان ۇلتتىق قۇراماسى قاتارىنا قوسىلىپ، الداعى ۋاقىتتا «FIRST Kazakhstan 2023» رەسپۋبليكالىق فينالىنا قاتىسۋعا مۇمكىندىك الادى، – دەيدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى ءانۋار ۋنايبەكوۆ.

سوڭعى ەكى جىلدا 2 مىڭعا جۋىق ءمۇعالىم روبوتوتەحنيكا كۋرسىنان وتكەن.