اۋىل مەكتەپتەرى وقۋشىلارىنىڭ رەسپۋبليكالىق وليمپياداسى بيىلعى جىلدىڭ قاراشا جانە 2024 جىلدىڭ قاڭتار ايلارى ارالىعىندا العاش رەت وتكىزىلەدى.
اتالمىش باستاما قالا مەن اۋىل مەكتەپتەرى اراسىنداعى الشاقتىقتى ازايتۋعا باعىتتالعان. بۇل تۋرالى ق ر وقۋ-اعارتۋ مينيسترلىگىندە وتكەن اپپارات وتىرىسىندا بەلگىلى بولدى، دەپ حابارلايدى Almaty-akshamy.kz.
«دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى عاجدەمبەك تۇرسىنوۆتىڭ ايتۋىنشا، وليمپياداعا اۋىل مەكتەپتەرىنىڭ 9-11 سىنىپ وقۋشىلارى قاتىسا الادى. مۇنداعى ماقسات – ەلىمىزدىڭ شالعاي ەلدى مەكەندەرىندەگى دارىندى جانە تالانتتى بالالاردىڭ قابىلەتتەرىن انىقتاپ، دامىتۋ، حالىقارالىق وليمپيادالارعا قاتىسۋعا ىنتالاندىرۋ.
«رەسپۋبليكالىق وليمپيادالاردا اكادەميالىق ادالدىقتى قامتاماسىز ەتۋ ءۇشىن تاپسىرمالار ءار قاتىسۋشىعا جەكە ەلەكتروندى تۇردە جىبەرىلەدى. وليمپيادانىڭ بارلىق كەزەڭدەرىندە وقۋشىلاردىڭ ءاتى-جونى كورىنبەيدى. ءار كەزەڭنەن كەيىن تاپسىرمالاردىڭ سكانەرلەنگەن نۇسقاسى، قاتىسۋشىلاردىڭ جۇمىستارى مەن دۇرىس جاۋاپتار ورتالىقتىڭ سايتىندا جاريالانادى»، - دەيدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى.
جوعارىدا اتالعان قاعيدالاردىڭ بارلىعى ەڭ بەدەلدى الەمدىك IMO، IPhO، IChO، IBO، IGeO، IOI جانە IOL وليمپيادالاردىڭ ەرەجەلەرىنە سۇيەنىپ جاساقتالعان. بۇل وليمپيادالاردا جەڭىمپاز بولعان قازاقستاندىقتارعا مەملەكەت تاراپىنان 500-دەن 1500 اەك-كە دەيىن قارجىلىق قولداۋ كورسەتىلەدى. بيىلعى جىلى 23 وقۋشى جۇلدەلى ورىندارعا يە بولدى.
«قازاقستاندىق وقۋشىلاردىڭ وسىنداي جوعارى جەتىستىكتەرىن ەسكەرە وتىرىپ، حالىقارالىق ۇيىمداستىرۋ كوميتەتى بيولوگيادان ەڭ بەدەلدى الەمدىك وليمپيادانى 2024 جىلى استانادا وتكىزۋ تۋرالى شەشىم قابىلدادى. وعان 80 ەلدەن 330-عا جۋىق ۇزدىك جاس بيولوگ قاتىسادى دەپ كۇتىلۋدە»، - دەيدى عاجدەمبەك تۇرسىنوۆ.
وقۋ-اعارتۋ ءمينيسترى عاني بەيسەمبايەۆ اتاپ وتكەندەي، مۇنداي اۋقىمدى شارانىڭ وتكىزىلۋى – ەلىمىزدىڭ بۇكىل وقۋ-اعارتۋ سالاسىنىڭ جەتىستىگى مەن جوعارى مارتەبە.
«پاندىك وليمپيادا – بالالاردىڭ ساناسىندا العاشقى عىلىمي ىزدەنىستەرگە جول سالاتىن، بولاشاق عالىمداردى شابىتتاندىراتىن، عىلىممەن ەركىن اينالىساتىن جاستار توبىن قالىپتاستىراتىن ەڭ اۋقىمدى باعدارلامالىق سايىس. قازاقستاندىق مەكتەپ وقۋشىلارىنىڭ بەدەلدى وليمپيادالارعا قاتىسۋ رەيتينگى جەڭىس قورجىنىندا مەدالدار سانىنىڭ كوبەيگەنىن، ءبىلىم ساپاسىنىڭ ارتقانىن كورسەتەدى. سوندىقتان رەسپۋبليكالىق وليمپيادالاردىڭ ءارقايسىسىنىڭ ساپالى ءارى جوعارى دەڭگەيدە ءوتۋى ماڭىزدى»، – دەپ قورىتىندىلادى عاني بەيسەمبايەۆ.
ايتا كەتۋ كەرەك، ەلىمىزدە جىل سايىن جالپى ءبىلىم بەرەتىن پاندەر بويىنشا مەكتەپ وقۋشىلارى اراسىندا وليمپيادالار ۇيىمداستىرىلادى. ولارعا 300 مىڭعا جۋىق مەكتەپ وقۋشىسى قاتىسۋدا.