جارىستى Defence Hub جانە جەرگىلىكتى اسكەري باسقارۋ ورگاندارىنىڭ قولداۋىمەن «جاس سارباز» بالالار-جاسوسپىرىمدەر اسكەري-پاتريوتتىق بىرلەستىگىنىڭ الماتىداعى فيليالى ۇيىمداستىردى.
الماتى وبلىسىنداعى بايسەركە اۋەايلاعىندا كەڭەس وداعىنىڭ باتىرى، ءبىرىنشى قورعانىس ءمينيسترى، حالىق قاھارمانى ارميا گەنەرالى ساعادات نۇرماعامبەتوۆكە ارنالعان ءجاسوسپىرىم تەحنيك-كونسترۋكتورلاردىڭ قالالىق جارىسى ءوتتى.
– زىمىران جانە اۆياسيا ۇلگىلەرىن جاساۋ سپورت ءتۇرىن دامىتۋ بۇگىندە ەداۋىر نازارعا الىنۋدا. بۇل بايقاۋ دارىندى بالالاردى انىقتاۋعا جانە قولداۋعا، ولاردىڭ تەحنيكالىق جانە شىعارماشىلىق قابىلەتتەرىن ارتتىرۋعا باعىتتالعان. جۋىردا وقۋشىلاردى وسى باعىتتا ماقساتتى تۇردە دايىنداۋدى جوسپارلاپ وتىرمىز، – دەدى جارىستىڭ باس تورەشىسى زىمىران ۇلگىلەرىن جاساۋ سپورتىنان الەم چەمپيونى يۋريي فيلچۋكوۆ.
جارىسقا 9-17 جاس ارالىعىنداعى 130-دىڭ ۇستىندە وقۋشى قاتىستى. جاس تەحنيكتەر S6 كلاستى ۇلگىلەردى جوبالاۋدا، وندىرۋدە، ىسكە قوسۋدا جانە باسقارۋدا باعىن سىنادى.
جارىس قورىتىندىسى بويىنشا ءبىرىنشى ورىندى № 78 مەكتەپ-گيمنازياسىنىڭ، ەكىنشى ورىندى الماتى جولاۋشىلار كولىگى جانە تەحنولوگيالار كوللەدجىنىڭ، ءۇشىنشى ورىندى № 137 مەكتەپتىڭ كوماندالارى يەلەندى. الماتى قالاسى №105 گيمنازياسىنىڭ وقۋشىلارى شارانى وتكىزۋگە جانە تورەشىلىككە بەلسەنە اتسالىستى.
