بۇگىن قازاقستاندا اتوم ەلەكتر ستانساسىنىڭ قۇرىلىسىنا قاتىستى رەسپۋبليكالىق رەفەرەندۋم وتۋدە. بىشكەكتە قازاقستاننىڭ قىرعىز رەسپۋبليكاسىنداعى ەلشىلىگى عيماراتىندا ورنالاسقان № 396 سايلاۋ ۋچاسكەسى استانا ۋاقىتىمەن تاڭعى ساعات 6:00-دە (جەرگىلىكتى ۋاقىت بويىنشا 7:00) ءوز جۇمىسىن باستادى، دەپ حابارلايدى Kazinform اگەنتتىگىنە سىلتەمە جاساپ.
رەفەرەندۋم وتەتىن ورىننىڭ سالتاناتتى اشىلۋ ءراسىمىن سايلاۋ كوميسسياسىنىڭ مۇشەلەرى مەن قازاقستاندىق ديپلوماتتار ۇيىمداستىردى. ءىس-شارا قازاقستان رەسپۋبليكاسىنىڭ انۇرانىمەن باستالدى.
ەلشىلىكتىڭ مالىمەتىنشە، سايلاۋشىلار تىزىمىندە قىرعىزستاندا جەكە، رەسمي، ءبىلىم بەرۋ، ىسكەرلىك جانە تۋريستىك ماقساتتا تۇراتىن نەمەسە جۇرگەن 300 قازاقستاندىق ازامات بار، ولاردىڭ باسىم بولىگى كونسۋلدىق ەسەپتە تۇر.
داۋىس بەرۋ ساعات 20:00-گە دەيىن جالعاسادى، ودان كەيىن ۋچاسكەلىك كوميسسيا مۇشەلەرى داۋىستاردى ساناۋعا كىرىسەدى. وسى ۋاقىت ارالىعىندا ەلىمىزدىڭ ازاماتتارى كونستيتۋسيالىق قۇقىعىن جۇزەگە اسىرىپ، ءوز تاڭداۋىن جاساي الادى.