ەلىمىزدە «ادىلدىكتى تالاپ ەت!» ناۋقانى باستالدى

بۇل ناۋقانعا قازاقستان رەسپۋبليكاسىنىڭ كەز كەلگەن ازاماتى قاتىسا الادى. 

«ادىلدىك جولى» رەسپۋبليكالىق قوعامدىق بىرلەستىگى سىبايلاس جەمقورلىققا قارسى اگەنتتىكپەن بىرلەسىپ، ەل بويىنشا اۆتوكولىك جولدارى سالاسىندا «ادىلدىكتى تالاپ ەت!» اتتى اۋقىمدى ناۋقاندى باستادى، دەپ حابارلايدى Almaty-akshamy.kz Elorda.info سايتىنا سىلتەمە جاساپ. 

ناۋقان بارىسىندا اۆتوجول سالاسى ماسەلەلەرى قوزعالىپ، جولداردى سالۋ، جوندەۋ جانە كۇتىپ ۇستاۋ كەزىندە جەمقورلىق تاۋەكەلدەرىن انىقتاۋعا باسا نازار اۋدارىلاتىن بولادى.

مەملەكەت اۆتوجول سالاسىنا ۇلكەن قاراجات بولەتىنىنە قاراماستان، وكىنىشكە قاراي، ول ۇنەمى قوعام تاراپىنان سىنعا ۇشىراۋدا. ساپاسىز جولداردىڭ سالدارىنان كوپتەگەن جول-كولىك وقيعالارى ورىن الدى.

«بيىل رەسپۋبليكا بويىنشا 11 مىڭنان استام شاقىرىم جولعا ءارتۇرلى جوندەۋ جۇمىستارى جۇرگىزىلەدى. بۇعان 600 ميلليارد تەڭگەدەن استام قارجى ءبولىندى. ال جول جوندەۋگە بولىنگەن قاراجاتتىڭ 44 پايىزىنا مەملەكەتتىك ساتىپ الۋ قورىتىندىسى جاسالعان جوق. اۆتوجولداردى سالۋ جوبالارىنىڭ بارلىق كەزەڭدەرى جەمقورلىق تاۋەكەلدەرىنە بەيىم. تەك مەملەكەت پەن ازاماتتاردىڭ بىرلەسكەن كۇشىمەن عانا، قوعامدى بارىنشا جەمقورلىققا قارسى كۇرەستە جۇمىلدىرا وتىرا، بۇل زۇلىمدىققا توتەپ بەرە الامىز. ازاماتتار ناۋقانعا Adildik.kz ۆەب-سايتى ارقىلى قوسىلىپ، 1463 Call center بويىنشا قازاقستان اۆتوجولدارىن سالۋ، جوندەۋ جانە كۇتىپ ۇستاۋ سالاسىنداعى جەمقورلىق تۋرالى اقپاراتتى 15 تامىزدان باستاپ حابارلاي الادى. بەيجاي قارامايتىن بارلىق ازاماتتاردى اتالمىش ناۋقانعا قوسىلىپ، بەلسەندىلىك تانىتۋعا شاقىرامىز»، – دەيدى «ادىلدىك جولى» ءرقب-نىڭ نۇر-سۇلتان قالاسىنداعى فيليالى باسشىسى د.قۇلجامبەكوۆ.