بالىق ەتى قىمباتتاۋىنىڭ بىردەن-بىر سەبەبى - ەلىمىزدەگى وزەن-كولدەردە بالىق قورى كۇرت ازايىپ كەتكەن.
سوندىقتان مەملەكەت تاراپىنان ارنايى باعدارلاما ازىرلەنىپ، تاۋارلى بالىق وسىرۋشىلەرگە ۇلكەن قولداۋ كورسەتىلىپ وتىر، دەپ حابارلايدى Almaty-akshamy.kz «حابار 24» سايتىنا سىلتەمە جاساپ.
الايدا سالانى العا باستىرماي، كەرى تارتاتىن جايتتار دا از ەمەس. سونىڭ ءبىرىنشىسى - ارينە، براكونەرلىك. بالقاش – الاكول وبلىسارالىق باسسەيندىك بالىق شارۋاشىلىعى ينسپەكسياسىنىڭ ماماندارى بيىل 522 رەيدتىك شارا ۇيىمداستىرىپ، تابيعات قورعاۋ زاڭناماسى بۇزىلۋىنىڭ 255 دەرەگىن انىقتادى. بالقاش – الاكول وبلىسارالىق باسسەيندىك بالىق شارۋاشىلىعى ينسپەكسياسى ماماندارىنىڭ ايتۋىنشا، بيىلعى جىلدىڭ العاشقى جارتى جىلدىعىندا زاڭسىز بالىق اۋلاعان 74 جەكە تۇلعا اكىمشىلىك جاۋاپكەرشىلىككە تارتىلعان. 15 قىلمىستىق ءىس سوتقا جونەلتىلىپ، 6 ادامعا قاتىستى ۇكىم شىقتى. زاڭ بۇزۋشىلارعا 6 ميلليون تەڭگەدەي ايىپپۇل سالىنعان.
«6 ايدىڭ قورىتىندىسى بويىنشا، زاڭ بۇزۋشىلاردان مەملەكەت پايداسىنا 6 مىڭ تونناعا جۋىق بالىق، 94 بالىق اۋلاۋعا تىيىم سالىنعان اۋلاۋ قۇرالدارى جانە 12 قايىق تاركىلەندى. بالىق رەسۋرستارىنا كەلتىرىلگەن زالال ءۇشىن 25 ميلليون تەڭگەدەن استام سوماعا تالاپ ارىز بەرىلدى»، - دەيدى بالقاش-الاكول وبلىسارالىق باسسەيندىك بالىق شارۋاشىلىعى ينسپەكسياسى باسشىسىنىڭ ورىنباسارى رينات كۋماشيەۆ.
بازار ارالاعان جان سازان، امۋر، كوكسەركە سياقتى بالىق تۇرلەرىنىڭ باعاسى ءتورت تۇلىك مالدىڭ ەتىنە تەڭەلگەنىن وتە جاقسى بىلەدى. جۇرتتى «ول نەگە كۇرت قىمباتتاپ كەتتى؟» دەگەن ساۋالدىڭ مازالايتىنى تۇسىنىكتى. جاۋاپ بىرەۋ. سوڭعى جىلدارى ەلىمىزدەگى بالىق قورى بىرنەشە ەسەگە دەيىن ازايدى. تىعىرىقتان شىعار جول – جابىق جانە اشىق توعانداردا تاۋارلى بالىق ءوسىرۋ. ەسىكتەگى حانبالىق شارۋاشىلىعى وتكەن جىلى ۋىلدىرىقتان پاتشابالىق شاباعىن وندىرۋمەن اينالىساتىن زاۋىتىن كۇردەلى جوندەۋدەن وتكىزدى. وندا جىلىنا 10 ميلليون شاباق وندىرىلەدى.
«بۇل جەردە 4 ادام عانا جۇمىس جاسايدى. بىلتىرعى جىلى تولىق كۇردەلى جوندەۋدەن ءوتتى. قازىرگى جاعدايدا ءوزىنىڭ قۋاتتىلىعىمەن جۇمىس جاساپ جاتىر. نەگىزگى بۇل جەردەگى ءبىزدىڭ مىندەتىمىز – ءوزىمىزدىڭ قازاقستاندىق بالىق ءوسىرۋ»، - دەيدى كاسىپكەر مارلەن ءتۇرسىنالى.
پرەزيدەنتتىڭ تىكەلەي تاپسىرماسىمەن قازاقستان 2030 جىلعا دەيىن 300 مىڭ تونناداي تاۋارلى بالىق ءوندىرىپ، بالىق قورەگىن شىعاراتىن 5 زاۋىت سالۋى ءتيىس. بۇل باعىتتا بالىق ءوسىرۋ مەملەكەتتىك باعدارلاماسى قابىلدانىپ، جۇزەگە اسىپ جاتىر. الايدا مامان تاپشى.
«قازاق ۇلتتىق ۋنيۆەرسيتەتىندەگى بالىق شارۋاشىلىعى ءبولىمىنىڭ جابىلۋى، مەملەكەتتەن گرانتتىڭ بولىنبەۋى وتە ۇلكەن كۇردەلى سۇراق بولىپ تۇر. ويتكەنى ءقازىر مامان جوق بولسا، بۇل ماماندىقتىڭ ءارى قاراي دامۋىنا وتە ويلانىپ قاراۋعا بولادى. «بۇل ماماندىقتىڭ ءبىزدىڭ ەلىمىزدە الەۋەتى جوق، دامىمايدى، بىزگە كەرەك ەمەس» دەگەن ماقساتپەن جاۋىپ تاستاپ وتىر»، - دەيدى كاسىپكەر مارەن ءتۇرسىنالى.
مارلەن ءتۇرسىنالى كولساي كولدەرى مەن نارىنقولداعى تاۋ وزەندەرىنەن جابايى حانبالىق تۇقىمىن اۋلاپ اكەلىپ، ۋىلدىرىعىنان شاباق وندىرۋدە. ءقازىر ولاردىڭ سالماعى 2 گراممعا جەتىپ قالدى. الماتى وبلىسىندا تاۋارلى بالىق وسىرۋمەن اينالىساتىن 30-عا جۋىق كاسىپورىن بار. ولار وتكەن جىلى 6 مىڭ توننادان استام بالىق تاۋارلى بالىق ءوندىردى. بيىل بۇل كولەمدى 8 مىڭ تونناعا جەتكىزۋ جوسپارلانىپ وتىر.
الماتى وبلىسىنىڭ اۋماعىندا بالىق شارۋاشىلىعىنا قاتىستى 12 جاڭا ينۆەستيسيالىق جوبا جۇزەگە اسىپ جاتقانىن دا ايتا كەتكەن ءجون.