ەلىمىزدە ادام ساۋداسىنا قارسى ءىس-قيمىل تۋرالى زاڭ ازىرلەنىپ جاتىر

بۇل تۋرالى مەملەكەت باسشىسىنىڭ قابىلداۋىندا بولعان مارات احمەتجانوۆ ايتتى.

ىشكى ىستەر ءمينيسترىنىڭ ايتۋىنشا، تۇرمىستىق زورلىق-زومبىلىق ءۇشىن جاۋاپكەرشىلىك كۇشەيتىلەدى، دەپ حابارلايدى Almaty-akshamy.kz

مەملەكەت باسشىسى قاسىم-جومارت توقايەۆ ىشكى ىستەر ءمينيسترى مارات احمەتجانوۆتى قابىلدادى. پرەزيدەنتكە بيىلعى 10 ايداعى كريمينوگەندىك جاعداي تۋرالى ەسەپ بەرىلدى.

ءمينيستردىڭ مالىمەتىنشە، كىسى ءولتىرۋ، زورلىق-زومبىلىق، توناۋ، ۇرلىق، مال ۇرلىعى، سونداي-اق بۇرىن سوتتالعاندار تاراپىنان، ماس كۇيىندە جانە وتباسىلىق-تۇرمىستىق سالادا جاسالعان قىلمىستار ازايعان.

مەملەكەت باسشىسىنا قۇقىقبۇزۋشىلىقتىڭ الدىن الۋ جۇمىستارى، اتاپ ايتقاندا، وتباسىلىق-تۇرمىستىق سالادا زورلىق-زومبىلىق جاساعانى ءۇشىن جاۋاپكەرشىلىكتى كۇشەيتۋ جونىندەگى كەشەندى شارالار ازىرلەۋ تۋرالى مالىمەت بەرىلدى.

سونىمەن قاتار ۇيىمداسقان قىلمىستىڭ سەبەپتەرى مەن قارجىلاندىرۋ كوزدەرىن جويۋعا باسا ءمان بەرە وتىرىپ، ولارعا قارسى كۇرەس تاسىلدەرىنىڭ وزگەرگەنى جونىندە باياندالدى.

ءمينيستردىڭ ايتۋىنشا، بوپسالاۋمەن، ادام ساۋداسىمەن، قارۋ-جاراقتى، ەسىرتكىنى زاڭسىز ساتۋمەن جانە باسقا دا قىلمىستارمەن اينالىسقان 33 ۇيىمداسقان قىلمىستىق توپتىڭ جولى كەسىلدى.

پوليسەيلەر زاڭسىز اينالىمداعى 12 تونناعا جۋىق ەسىرتكىنى، سونىڭ ىشىندە ونىڭ 212 كگ سينتەتيكالىق تۇرلەرىن تاركىلەدى. 36 ەسىرتكى زەرتحاناسى مەن 43 ەسىرتكى كانالى جويىلدى، ەسىرتكى جارنامالايتىن 1900 سايت بۇعاتتالدى. مينيسترلىك ناشاقورلىققا جانە ەسىرتكى بيزنەسىنە قارسى ءۇش جىلعا ارنالعان كەشەندى جوسپار ازىرلەپ جاتىر.

سونىمەن قاتار پرەزيدەنتكە «ادام ساۋداسىنا قارسى ءىس-قيمىل تۋرالى» جەكە زاڭ ازىرلەنىپ جاتقانى تۋرالى باياندالدى.

كەزدەسۋ سوڭىندا توقايەۆ ەلىمىزدە ازاماتتاردىڭ قاۋىپسىزدىگىن جانە قۇقىقتىق ءتارتىپتى قامتاماسىز ەتۋگە باعىتتالعان ءبىرقاتار ناقتى تاپسىرما بەردى.