كۇدىكتى 8 جاسار قىزدىڭ قۇلاعىنداعى سىرعاسىن شەشىپ العان.
بۇل قىلمىس تۋرالى پوليسياعا قىزدىڭ اناسى حابارلاعان. ايەلدىڭ ايتۋىنشا، قالاداعى ءدارىحانالاردىڭ بىرىندە بەلگىسىز ەر ادام ونىڭ كىشكەنتاي قىزىنىڭ قۇلاعىنداعى سىرعاسىن شەشىپ العان، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بوتەننىڭ مۇلكىن اشىق تۇردە ۇرلاۋ دەرەگى بەينەباقىلاۋ كامەرالارىنا ءتۇسىپ قالعان. بەينەجازبادا قاسكويدىڭ بالانىڭ قۇلاعىنان سىرعاسىن قالاي الىپ جاتقانى كورسەتىلگەن. ەڭ الدىمەن، بەلگىلەر بويىنشا كۇدىكتىنىڭ جەكە سۇلباسى قۇراستىرىلدى. جەدەل ىزدەستىرۋ ءىس-شارالارىن جۇرگىزۋ بارىسىندا ءبىزدىڭ بولىمشەنىڭ قىزمەتكەرلەرى سول كۇنى 49 جاستاعى ك.ەسىمدى قالا تۇرعىنىن ۇستادى. كۇدىكتى قىلمىس جاساعانىن مويىندادى. قازىرگى ۋاقىتتا ونىڭ جەكە باسىنىڭ بۇرىن جاسالعان باسقا دا قىلمىستارعا قاتىسىنىڭ بار-جوعى تەكسەرىلۋدە. اتالعان دەرەك بويىنشا ق ر قك-نىڭ 191-بابى 1-بولىگى بويىنشا قىلمىستىق ءىس قوزعالىپ جاتىر»، – دەدى اۋەزوۆ اۋداندىق پب جانىنداعى پوليسيا ءبولىمىنىڭ باستىعى ەلنۇر قۇدرەتبايەۆ.