2024 جىلعى قاراشادا قازاقستان سينوپتيكتەرى اۋا رايىنا قاتىستى بىرنەشە رەكوردتى تىركەدى، دەپ حابارلايدى aqshamnews.kz.
قاراشانىڭ ءبىرىنشى ونكۇندىگىندە قازاقستاننىڭ شىعىس بولىگىندە وڭ تەمپەراتۋرالىق فون بايقالدى، بىرنەشە رەكورد جاڭاردى: 3 قاراشادا بالقاش مەتەوستانسياسىندا تەمپەراتۋرا +15،9 گرادۋسقا جەتىپ، 1955 جىلعى رەكوردتى (+15،8 گرادۋس) جاڭارتتى. پاۆلودار مەتەوستانسياسىندا تەمپەراتۋرا +15،6 گرادۋسقا دەيىن كوتەرىلدى. بۇرىنعى رەكورد 1988 جىلى تىركەلگەن، سول كەزدە اۋا تەمپەراتۋراسى +13،7 گرادۋس بولعان.
قاراشانىڭ ەكىنشى ونكۇندىگىنىڭ باسىندا انتيسيكلون قازاقستاننىڭ باسىم بولىگىن قامتىدى، ناتيجەسىندە تۇنگى اۋا تەمپەراتۋراسى -11-19 گرادۋسقا، وڭتۇستىكتە -5-10 گرادۋسقا دەيىن تومەندەدى.
ورتالىق جانە شىعىس ايماقتاردىڭ كەي جەرلەرىندە تەرمومەتر باعاندارى -23-29 گرادۋسقا دەيىن تومەندەدى. 13 قاراشادا قاراعاندى وبلىسىنداعى اقتوعاي مەتەوستانسياسىندا اۋا تەمپەراتۋراسى -26،2 گرادۋسقا جەتىپ، 2018 جىلعى رەكوردتى جاڭارتتى، ول كەزدە تەمپەراتۋرا -25،1 گرادۋس بولعان، – دەدى سينوپتيكتەر.
اي بويى بەلسەندى اتموسفەرالىق فرونتتارى بار سيكلوندار رەسپۋبليكا اۋماعىندا جاۋىن-شاشىندى جانە جەلدى اۋا رايىن قالىپتاستىردى. مۇندا دا رەكوردتار تىركەلدى.
اقتوبە وبلىسىندا 1 قاراشادا ايلىق جاۋىن-شاشىن نورماسى – 16 ميلليمەتر ءتۇستى، ايلىق نورما – 18 ميلليمەتر. 5 قاراشادا ويىل مەتەوستانسياسىندا – 15 ميلليمەتر، ال ايلىق نورما – 22 ميلليمەتر. 11 قاراشادا كۇرشىم مەتەوستانسياسىندا 30 ميلليمەتر جاۋىن-شاشىن تۇسكەن، ايلىق نورماسى 28 ميلليمەتر بولادى، – دەپ حابارلادى مەتەورولوگتار.
استانادا قاراشاداعى ورتاشا تەمپەراتۋرا -3،5 گرادۋس بولىپ، نورمادان 1،7 گرادۋسقا جوعارى بولدى. ەڭ تومەنگى تەمپەراتۋرا 30 قاراشادا -14،8 گرادۋس بولىپ تىركەلسە، 3 قاراشادا ەڭ جوعارى تەمپەراتۋرا +13،6 گرادۋسقا جەتتى. اي بويى 38 ميلليمەتر جاۋىن-شاشىن ءتۇستى، بۇل ايلىق نورمانىڭ 131 پايىزىنا تەڭ (نورما – 29 ميلليمەتر).
قازاقستاندىقتاردى وتكەن ايدا جەل دە تاڭعالدىردى. مىسالى، اقمولا وبلىسىندا 3 قاراشادا جەلدىڭ ەكپىنى سەكۋندىنا 30 مەترگە جەتسە، 6 قاراشادا جامبىل وبلىسىندا 31 مەترگە جەتتى.
7 قاراشادا بىرنەشە ايماقتا قاتتى جەل تىركەلدى: قاراعاندى وبلىسىندا سەكۋندىنا 30-34 مەتر، پاۆلودار وبلىسىندا 30-31 مەتر، ال جەتىسۋ وبلىسىندا 36 مەترگە دەيىن جەتتى. 24 قاراشادا جامبىل وبلىسىندا جەل ەكپىنى سەكۋندىنا 36 مەترگە دەيىن جەتتى، – دەپ مالىمدەدى سينوپتيكتەر.