ءماجىلىس دەپۋتاتى ەدىل جاڭبىرشين Air Astana-نىڭ قىزمەتىنە كوڭىلى تولمايتىنىن ايتتى.
ول اۋە كومپانيالارىن دۇرىستاپ قولعا الۋ كەرەكتىگى جونىندە ماسەلە كوتەردى، دەپ حابارلايدى aqshamnews.kz.
ونىڭ سوزىنشە، Air Astana ايىپپۇل ءالى تولەمەگەن.
ءبىزدىڭ دەپۋتاتتار Air Astana-عا قاتىستى ماسەلەنى كوتەرىپ جاتىر. شىنىندا دا، Air Astana ءبىزدىڭ اسپاننىڭ قۇدايى بولىپ العان. بيلەتتىڭ ءبارى جاقىنداعان كەزدە كوتەرىلەدى، اراقاشىقتىققا بايلانىستى دەگەن بوس اڭگىمە. بيلەت جاقىنداعان كەزدە كوتەرىلمەۋ كەرەك. كەرىسىنشە باعاسى ءتۇسۋى قاجەت. سەبەبى ول بيلەتتى تەزىرەك وتكىزۋ كەرەك قوي. بۇلار كەرىسىنشە جۇمىس ىستەيدى. فوستەر مىرزا، ءسىز مىنا شاڭىراققا قاراڭىز. ءسىز وسى مەملەكەتتىك زاڭىنا باعىنۋىڭىز كەرەك. سامات مۇسابايەۆ ەكەۋمىز ءبىر ساعات كەشىككەنگە ءۇش پايىز ايىپپۇل سالاتىن نورما ەنگىزدىك. ەندى قىزىقتى قاراڭىزدار. مەن 2 تامىزدا ۇشۋىم كەرەك بولعان، الايدا ۇشاق 12 ساعاتقا كەشىكتى، ءالى كۇنگە دەيىن ايىپپۇلىن الا الماي ءجۇرمىن. نەگە؟ ولار قيتۇرقى سحەما جاساپ قويعان، – دەيدى دەپۋتات.
ونىڭ سوزىنشە، تەك Air Astana ەمەس، كولىكتە زاڭمەن قاراستىرىلعان قايتارىلاتىن كومپەنساسيانى دا جەڭىلدەتۋ كەرەك. كەز كەلگەن ادام ءوتىنىشتى وڭاي بەرىپ، اقشا ونىڭ شوتىنا تەزىرەك ءتۇسۋى كەرەك دەپ ەسەپتەيدى.
Air Astana-نىڭ بۇكىل مۋلتيمەدياسى وزگە تىلدە. ولاردىڭ سايتىنا كورىنگەن ادام كىرىپ، ىشىنەن تاۋىپ الىپ، ءوتىنىشتى جازىپ، اقشاسىن كەرى قايتارىپ الۋ وتە قيىن ماسەلە. تەك قانا كومپيۋتەردى بىلەتىن، سونىڭ سوڭىندا ەرىنبەي جۇرەتىن ادام عانا اقشاسىن قايتارا الادى. وسىنىڭ ءبارىن ادەيى ىستەپ قويعان. مەملەكەتتىك تىلدە كونتەنت وتە از. ونى بىرنەشە رەت ايتىپ ءجۇرمىز. ونى ورنىنا كەلتىرۋ كەرەك. بۇل دا ۇلكەن ماسەلە. نەگە ول جەردە مەملەكەتتىك تىلگە باسىمدىق بەرىلمەيدى؟ ەڭ بولماسا 50/50 ەتىڭدەر. ال وندا مۋلتيمەدياداعى مەملەكەتتىك ءتىلدىڭ ۇلەسى 10 پايىز عانا. فوستەر مىرزا، ءسىز پارلامەنتكە ءبىرىنشى كەلىپ وتىرسىز. قازاقستان اۋماعىنا كىرگەننەن كەيىن ءبىرىنشى كەزەكتە قازاقستان ازاماتتارىنىڭ مۇددەسىن قورعاپ، قازاقستاننىڭ زاڭىن سىيلاۋىڭىز كەرەك. وسى جەردە جاعدايدى جاساۋىڭىز قاجەت. ءسىز پايدا كورەمىز دەپ بيلەتتى كوتەرە بەرمەڭىز. ءبىزدىڭ تەرريتوريامىز كۇندە رەزىڭكە بولىپ سوزىلىپ ءوسىپ جاتقان جوق. ال سىزدەر باعانى كوتەرەسىزدەر. بيلەتتىڭ باعاسى 60 مىڭ تەڭگەدەن 120 مىڭ تەڭگەگە دەيىن كەتىپ قالادى. ولاي بولماۋ كەرەك. مينيسترلىك بۇل اۋە كومپانيالارى دۇرىستاپ قولعا الۋى ءتيىس، – دەدى دەپۋتات ەدىل جاڭبىرشين.
دەپۋتات ءسوز سوڭىندا Air Astana-نىڭ باسشىسى پيتەر فوستەرگە:
ءسىز ءبىزدى وسى جەردە وتىرىپ الىپ مەنسىنبەي وتىرسىز. كۇلەتىن ەشتەڭە ەمەس. ءسىز كۇلمەڭىز. ءبىز سىزگە ەشتەڭەنى تۇسىنبەيتىن افريكاداعى ابوريگەن ەمەسپىز. بۇلاي ويناماڭىز. پارلامەنتتە وتىرسىز. وسى جەردە وتىرعانداردىڭ ءبارىن حالىق سايلاعان. حالىقتىڭ وكىلدەرى، – دەدى ماجىلىسمەن.