بۇل تۋرالى جوعارعى اۋديتورلىق پالاتا حابارلادى.
قازاقستاننىڭ ورتا ءبىلىم بەرۋ سالاسىندا 62،4 ملرد تەڭگە قاراجات پەن رەسۋرستاردى ءتيىمسىز جوسپارلاۋ انىقتالدى، دەپ حابارلايدى aqshamnews.kz
ءبىلىم بەرۋ ستاندارتتارى سالاسىنداعى رەفورمالار جۇيەلى جۇرگىزىلمەيدى. وقۋ جوسپارلارىنداعى ءجيى وزگەرىستەر شىعارىلىپ قويعان وقۋلىقتاردى قايتا قاراۋعا جانە بيۋدجەتتىڭ ءتيىمسىز شىعىستارىنا اكەلەدى. سوڭعى 5 جىلدا وقۋلىقتاردى قايتا قاراۋ سالدارىنان ەكونوميكالىق شىعىندار 16 ملرد تەڭگەدەن اسقان.
"وقۋلىقتاردىڭ ساپاسىن ساراپتاۋ مەن باقىلاۋدا كەمشىلىكتەر انىقتالدى. 5 جىل ىشىندە باعالاۋ ولشەمشارتتارى 12 رەت وزگەرگەن، بۇل ورنىقتى باعالاۋ جۇيەسىنىڭ جوق ەكەنىن كورسەتەدى. مەملەكەتتىك كورسەتىلەتىن قىزمەتتەردى باقىلاۋ اقپاراتتىق جۇيەسى ارقىلى ساراپتاما ءتارتىبى ىسكە اسىرىلماعان، راسىمدەر قاعاز جۇزىندە جۇرگىزىلەدى"، - دەپ جازىلعان حابارلامادا.
سونىمەن قاتار ليسەنزيالاۋ ساپالى ءبىلىم الۋداعى مەملەكەتتىك كەپىلدىگىنىڭ ءبىرى بولسا دا، ەلدە مەملەكەتتىك مەكتەپتەردى قوسا العاندا، 66 مەكتەپ ليسەنزياسىز جۇمىس ىستەيدى. اتتەستاتتاۋدان ءساتتى ءوتۋ پايىزى تومەن، بۇل ءبىلىم بەرۋ مەكەمەلەرىندە تارالعان جۇيەلى پروبلەمالاردى دالەلدەيدى. مەكتەپتەردىڭ تەك 18،2%-ى اتتەستاتتاۋدان ءبىر دەگەننەن وتە الادى.
جالپى مەملەكەتتىك اۋديت بارىسىندا 1،1 ملرد تەڭگەگە قارجىلىق بۇزۋشىلىقتار، 62،4 ملرد تەڭگەگە قاراجات پەن رەسۋرستاردى ءتيىمسىز جوسپارلاۋ، 3،2 ملرد تەڭگەنى ءتيىمسىز پايدالانۋ انىقتالدى.