ءبىراق كورسەتكىش بۇدان كوپ بولۋى مۇمكىن.
ويتكەنى سىرى بەيمالىم دەرتتى دەر كەزىندە انىقتاۋ كەنجە قالىپ كەلەدى. الماتىدا وتكەن «اۋتيزم. جاڭا مۇمكىندىكتەر» اتتى حالىقارالىق كونفەرەنسيادا عالىمدار مەن پەداگوگ-پسيحولوگتار اۋتيزمگە شالدىققان بالالارمەن جۇمىس ىستەۋدەگى وزىق ادىستەمەلەردى ورتاعا سالدى، دەپ حابارلايدى Almaty-akshamy.kz 24.kz-كە سىلتەمە جاساپ.
الەمدە 80 ملن ادام ءاۋتيزمنىڭ ازابىن تارتىپ كەلەدى. ال قازاقستان بۇل دەرتكە وسىدان 10 جىل بۇرىن عانا نازار اۋدارىپ، ەرەكشە بالالارمەن جۇمىس جۇرگىزىلە باستادى. بۇگىندە ەلىمىزدە 11 اۋتيزم ورتالىعى بار. وندا 200-دەن استام مامان ءوز الەمى بار ەرەكشە بالالاردى ورتاعا قوسۋ ءۇشىن ەڭبەك ەتىپ كەلەدى. «حالىقارالىق ادىستەمەلەرگە نەگىزدەلگەن ارنايى باعدارلامالار بويىنشا اۋتيست بالالاردىڭ ومىرلىك، الەۋمەتتىك داعدىلارىن قالىپتاستىرۋعا بولادى»، - دەيدى ماماندار. ەڭ باستىسى - ەرتە دياگنوستيكالاۋ.
«بالانىڭ اينالاسىمەن قارىم-قاتىناس جاساعىسى كەلمەۋى - اۋرۋدىڭ ءبىرىنشى بەلگىسى. سونداي-اق بالا زەر سالماسا، ەسىمىن اتاعاندا قاراماسا، اتا-انالار وعان ءمان بەرۋى كەرەك. تەك ويىنشىق ويناۋمەن شەكتەلسە، قابىرعادان قابىرعاعا جۇگىرسە، ەموسياسىن كورسەتپەسە، مۇنى دابىل دەپ قابىلداۋ كەرەك. مۇنداي قىلىقتاردى بالانىڭ بويىنان 1،5-2 جاسىندا اڭعارۋعا بولادى. ەگەر وسىنداي بەلگىلەر بايقالسا، ماماندارعا جۇگىنگەن دۇرىس»، - دەيدى اۋتيزم ورتالىعىنىڭ جەتەكشىسى الميرا كاليموۆا.