جول ينفراقۇرىلىمى – ەلدىڭ ەكونوميكالىق جانە الەۋمەتتىك دامۋىنىڭ نەگىزى. قازاقستاندا كەڭ اۋماقتى قامتيتىن 96 مىڭ شاقىرىمنان استام اۆتوموبيل جولدارى بار. بۇل ەلدىڭ ىشكى قاتىناسىن قامتاماسىز ەتىپ قانا قويماي، حالىقارالىق ترانزيت ءۇشىن دە ۇلكەن ماڭىزعا يە. الايدا، جولداردىڭ ساپاسى مەن ينفراقۇرىلىم جاعدايى ءالى كۇنگە دەيىن حالىق اراسىندا تالقىلاناتىن وزەكتى ماسەلەلەردىڭ ءبىرى.
بيىل ەلىمىزدە 4،7 مىڭ شاقىرىم رەسپۋبليكالىق ماڭىزداعى جول سالىنادى. ونىڭ 3،7 مىڭ شاقىرىمى I ساناتتى، ال قالعان 1 مىڭ شاقىرىم II ساناتتى جولدار بولماق.
2024 جىلى قۇرىلىس، قايتا جاڭارتۋ جانە جوندەۋ جۇمىستارىنىڭ جالپى كولەمى 12 مىڭ شاقىرىم جولدى قۇرادى. بۇل – رەكوردتىق كورسەتكىش. جول قۇرىلىسى ماۋسىمىندا رەسپۋبليكالىق ماڭىزى بار اۆتوموبيل جولدارىن قايتا جاڭعىرتۋ جانە جوندەۋ جوبالارىنا 25 مىڭنان استام ادام مەن 10 مىڭنان استام ارنايى تەحنيكا جۇمىلدىرىلدى.
7 مىڭ شاقىرىم جولدىڭ قۇرىلىسى اياقتالدى. اتاپ ايتقاندا، قاراعاندى – الماتى، تالدىقورعان – وسكەمەن، اقتوبە – قاندىاعاش جانە اتىراۋ – استراحان كۇرە جولدارىندا قۇرىلىس جۇمىسى ءبىتتى. جوبالاردى ىسكە اسىرۋ كولىكتەردىڭ ءقاۋىپسىز ءوتۋىن قامتاماسىز ەتۋگە، جول ءجۇرۋ ۋاقىتىن ەداۋىر قىسقارتۋعا، جولدىڭ وتكىزۋ قابىلەتىن ارتتىرۋعا، ەل ايماقتارى اراسىنداعى كولىك بايلانىسىن ايتارلىقتاي جاقسارتۋعا مۇمكىندىك بەردى.
اكىمدىكتەر جەرگىلىكتى ماڭىزى بار 3،6 مىڭ شاقىرىمنان استام جولدى پايدالانۋعا بەردى. جوندەۋ جۇمىستارىنىڭ ەڭ كوپ كولەمى قوستاناي، سولتۇستىك قازاقستان، شىعىس قازاقستان، اقتوبە جانە پاۆلودار وبلىستارىندا ورىندالدى. بۇدان باسقا، ەل كولەمىندە جول قۇرىلىسىنا قاتىستى كوپتەگەن ءىرى جوبالار جۇزەگە استى.
قاۋىپسىزدىك كەپىلى
الماتى تۇرعىندارىنىڭ كۇندەلىكتى ومىرىنە تىكەلەي اسەر ەتەتىن ماڭىزدى ينفراقۇرىلىمنىڭ ءبىرى – جول. تىرشىلىكتىڭ كۇرەتامىرى سانالاتىن جولدىڭ ساپاسىن جاقسارتۋدا مەگاپوليستە كوپتەگەن جوبالار ىسكە اسىرىلۋدا.
بۇل باعىتتا قالادا بىلتىر اۋىز تولتىرىپ ايتارلىقتاي جاعىمدى جاڭالىق كوپ بولدى. اتاپ ايتار بولساق، 2024 جىلى الماتىدا 25 شاقىرىم جاڭا جول سالىندى. اسىرەسە، قۇلجا تاس جولىنىڭ 6 جولاققا دەيىن كەڭەيۋىن تۇرعىندار قۋانا قابىلدادى. بۇل باعىتتاعى ساعاتتاپ تۇراتىن كەپتەلىستەن قۇتىلعان كوپشىلىك ءقازىر سول جولداردىڭ يگىلىگىن كورۋدە. بۇدان بولەك، 255 كوشەدە 250 شاقىرىم جولعا ورتاشا جوندەۋ جۇرگىزىلگەنىن دە ايتا كەتۋ كەرەك. سونداي-اق، 2024 جىلى ساين – موڭكە بي جولايرىعىن سالۋ جانە اباي داڭعىلىن ۇزارتۋ جۇمىستارىنان قالا قوزعالىسىنا جاڭا تىنىس اشىلدى.
الماتى قالالىق موبيلدىلىك باسقارماسىنىڭ مالىمەتىنشە، بيىل قالادا شامامەن، 35 شاقىرىم جاڭا جول سالىنىپ، 300 شاقىرىم جولعا جانە 30 شاقىرىم جاياۋ جۇرگىنشىلەر جولىنا ورتاشا جوندەۋ جۇمىستارىن جۇرگىزۋ جوسپارلانعان. جاڭا جولدار نەگىزىنەن «جاس قانات»، «شۇعىلا»، «المەرەك»، «اقجار»، «راحات»، «مادەنيەت»، «بورالداي»» شاعىناۋداندارىن قامتيدى. بۇل قالاعا كەيىننەن قوسىلعان اۋدانداردا تۇراتىن 70 مىڭنان استام تۇرعىننىڭ كولىك قاتىناسىن جاقسارتادى. سونداي-اق، 2025 جىلى مەگاپوليستە سەيفۋللين – جانسۇگىروۆ جولايرىعىن ىسكە قوسۋ، ساين كوشەسىن رىسقۇلوۆ داڭعىلىنان اقىن سارا كوشەسىنە دەيىن ۇزارتۋ؛ اباي داڭعىلىن قالانىڭ شەكاراسىنا دەيىن ۇزارتۋ جۇمىستارى سەكىلدى بىرنەشە ماڭىزدى جوبانىڭ قۇرىلىسى اياقتالادى. سالا ماماندارى 2024 جىلى الماتى جولدارىنىڭ 92%-ى ساپالى دەپ تانىسا، بۇل كورسەتكىشتى 2025 جىلى 95%-عا دەيىن ارتتىرۋدى جوسپارلاپ وتىر.
تىرشىلىكتىڭ كۇرەتامىرى سانالاتىن جولدىڭ جاعدايى قاي وڭىردە بولسا دا ماڭىزدى ماسەلە. سوندىقتان جايلى جول، بۇل – تەك، فيزيكالىق جاعىنان جاقسى بولۋ عانا ەمەس، ول ادامعا رۋحاني جانە پسيحولوگيالىق تۇرعىدا دا جايلىلىق پەن راحات اكەلەتىن ەلەمەنت.
تاقىرىپقا وراي
اسان بوستانوۆ،
الماتى قالالىق موبيلدىلىك باسقارماسى
باسشىسىنىڭ ورىنباسارى:
قالا دامۋىنا سەرپىن بەرەدى
2024 جىلى الماتىدا جول ينفراقۇرىلىمىن جاقسارتۋ ماقساتىندا اۋقىمدى جۇمىستار اتقارىلدى. جالپى، 255 كوشەدە 250 شاقىرىم جولعا ورتاشا جوندەۋ جۇرگىزىلدى. بۇل شارالار جولداردىڭ ساپاسىن ارتتىرىپ قانا قويماي، كولىك قوزعالىسىنىڭ قاۋىپسىزدىگىن جاقسارتۋعا سەپتىگىن تيگىزدى. سونىمەن قاتار، ساين – موڭكە بي كوشەلەرىندەگى جاڭا جولايىرىقتار اشىلىپ، نەگىزگى ماگيسترالداردى كەڭەيتۋ جۇمىستارى جالعاستى. قۇلجا تاس جولى كەڭەيىپ، 6 جولاق بولدى.
وزدەرىڭىز بىلەسىزدەر، جىل سايىن ارتىپ كەلە جاتقان كولىك سانى، ۋربانيزاسيا جانە حالىق سانىنىڭ ءوسۋى جول ينفراقۇرىلىمىن دامىتۋ قاجەتتىگىن ارتتىرا تۇسۋدە. سول سەبەپتى ءبىز قالا كوشەلەرىندەگى اسفالتتىڭ ساپاسىن جاقسارتۋ، توزىمدىلىكتى ارتتىرۋ جانە جولداردىڭ قىزمەت مەرزىمىن ۇزارتۋ ماقساتىندا جولدارعا پوليمەرلى-بيتۋمدىق قوسپالاردى پايدالانا باستادىق. بۇگىندە مۇنداي ماتەريالدار زاماناۋي جول قۇرىلىسىندا كەڭىنەن قولدانىلىپ كەلەدى.
تاقتايداي ءتۇزۋ جول – تۇرعىنداردىڭ كۇندەلىكتى ومىرىنە تىكەلەي اسەر ەتەتىنىن ەسكەرسەك، جول جوندەۋ جۇمىستارى قاي وڭىردە بولسا دا، توقتاماۋى ءتيىس.
2025 جىلى الماتىدا بىرنەشە ماڭىزدى جوبانىڭ قۇرىلىسى اياقتالادى دەپ كۇتىلۋدە. سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جولايرىق قۇرىلىسى تولىعىمەن اياقتالىپ، ونىڭ ماڭىنداعى اۋماقتى اباتتاندىرۋ جۇمىستارى دا جۇرگىزىلەدى. ساين كوشەسىن رىسقۇلوۆ داڭعىلىنان اقىن سارا كوشەسىنە دەيىن، اباي داڭعىلىن قالانىڭ شەكاراسىنا دەيىن ۇزارتۋ سەكىلدى جۇمىستار اياقتالادى دەپ كۇتىلۋدە. بۇل جۇمىستار قالا دامۋىنا سەرپىن بەرەدى.
تامەرلان توقتاربەكوۆ،
بوستاندىق اۋدانى اكىمى اپپاراتىنىڭ ينجەنەرلىك جانە جول ينفراقۇرىلىمى ءبولىمىنىڭ باس ينسپەكتورى:
تۇراقتى كۇتىم
جولدىڭ قىزمەت ەتۋ مەرزىمىن ۇزارتادى
– قالانىڭ ءال-اۋقاتى مەن ونىڭ بولاشاعىن جاقسارتۋدا ينفراقۇرىلىمدى دامىتۋ مەن اعىمداعى جوندەۋ جۇمىستارى باستى ءرول اتقارادى. ويتكەنى، جولدىڭ ساپاسى ەكونوميكالىق ءوسۋ، ءومىر ءسۇرۋ ساپاسىن جاقسارتۋ، تۋريزم جانە شەتەلدىك ينۆەستيسيالار، تۇراقتى دامۋ مەن ۇزاق مەرزىمدى پەرسپەكتيۆالارعا تىكەلەي اسەر ەتەدى. ينفراقۇرىلىمدى جاقسارتۋ – قالانىڭ بۇگىنگى كەلبەتىن عانا ەمەس، سونىمەن بىرگە ونىڭ بولاشاقتا قالاي داميتىنىن، تۇرعىندارىنىڭ ءومىر ءسۇرۋ ساپاسىن قامتاماسىز ەتەتىنىن جانە ونىڭ بارلىق سالالارىنا جاڭا مۇمكىندىكتەر جاسايتىنىن بىلدىرەدى.
ايتا كەتۋ كەرەك، جول جوندەۋ جۇمىستارى ءتيىمدى جانە ۋاقتىلى جۇرگىزىلسە، ولار جولدىڭ جاعدايىن ناشارلاتاتىن، جابىنعا تۇسەتىن جۇكتەمەنى ارتتىرىپ، ونىڭ توزۋىن تەزدەتەتىن جارىقتار مەن شۇڭقىرلار سياقتى زاقىمداردى جويۋعا كومەكتەسەدى. ال تۇراقتى كۇتىم جولدىڭ قىزمەت ەتۋ مەرزىمىن ۇزارتىپ، بولاشاقتا كۇردەلى جوندەۋدى قاجەت ەتپەيدى.