بۇگىندە الماتى، استانا قالالارى مەن الماتى، جەتىسۋ جانە قاراعاندى وبلىستارىنىڭ 36 جوو مەن كوللەدجدەرىنىڭ 4 مىڭعا جۋىق ستۋدەنتى «مەنىڭ باۋىرىم» جوباسىنا قاتىسۋدا.
ەرىكتىلەر قاتارىنا پەداگوگ، پسيحولوگ، الەۋمەتتىك پەداگوگ، زاڭگەر، IT ماماندىقتارى بويىنشا ءبىلىم الۋشى 3-4 كۋرس ستۋدەنتتەرى قوسىلدى، دەپ حابارلايدى Almaty-akshamy.kz ق ر وقۋ-اعارتۋ مينيسترلىگىنە سىلتەمە جاساپ.
ستۋدەنتتەر ەلىمىزدىڭ 217 مەكتەبىندە ەرىكتى بولىپ قىزمەت اتقارۋدا. جوبانى ىسكە اسىرۋدا ءتۇرلى جانە ءتيىمدى تاسىلدەر قولدانىلادى. اسىرەسە زەرتتەۋ جۇرگىزۋگە ەرەكشە كوڭىل بولىنۋدە، ونىڭ ىشىندە تۋعان جەردى، ەكولوگيانى زەردەلەۋ، سونداي-اق جوبالار بويىنشا زەرتتەۋ قورىتىندىسىن تانىستىرۋدى ەرىكتىلەر قىزمەتىن قورىتىندىلاۋ سەكىلدى مەكتەپىشىلىك شارالارمەن ورايلاستىرۋ جوسپارلانۋدا. سونىمەن قاتار شەبەرلىك سىنىپتارى، فلەشموبتار، چەللەندجدەر، سپورتتىق تۋرنيرلەر، قايىرىمدىلىق اكسيالارى، توك-شوۋ جانە TEDX فورماتىنداعى سىنىپتان تىس ءىس-شارالار قاراستىرىلعان. بۇل جۇمىس تۇرلەرى جوباعا قاتىسۋشىلاردىڭ دامۋىنا ىقپال ەتەتىن ينتەراكتيۆتى جانە جان-جاقتى ءبىلىم بەرۋ ورتاسىن قۇرۋعا باعىتتالعان.
«بۇل ءتۇرلى جاستاعى ادامداردى بىرىكتىرەتىن رەسپۋبليكالىق اۋقىمداعى بىرەگەي الەۋمەتتىك جوبا. ونىڭ ىشىندە پەداگوگتەر، ستۋدەنتتەر، بالالار مەن اتا-انالار بار. بۇل جوبا بارلىعىنا پايدالى بولادى جانە بولاشاقتىڭ مەكتەبىن قۇرۋ ءۇشىن كۇش بىرىكتىرۋگە مۇمكىندىك بەرەدى، وندا اركىم ءوزىنىڭ قاجەتتى جانە ماڭىزدى ەكەنىن سەزىنىپ، بويىنداعى ۇزدىك قارىم-قابىلەتتەرىن اشادى»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ايتا كەتەيىك، جوبا وتكەن جىلدىڭ قاراشا ايىندا وقۋ-اعارتۋ مينيسترلىگى مەن عىلىم جانە جوعارى ءبىلىم مينيسترلىگى تاراپىنان مەكتەپ وقۋشىلارى ءۇشىن قولايلى جانە دامىتۋشى ءبىلىم بەرۋ ورتاسىن قۇرۋعا ىقپال ەتۋ ماقساتىندا باستالعان بولاتىن. «مەنىڭ باۋىرىم» دەگەن ءسوزدىڭ ماعىناسى تەك قورعاۋ عانا ەمەس، سونداي-اق رۋحاني قولداۋ دەگەندى دە بىلدىرەدى.