مينيستر كادر ماسەلەسى قالاي شەشىلەتىنىن ايتتى
ۇكىمەت وتىرىسىندا عىلىم جانە جوعارعى ءبىلىم ءمينيسترى ساياسات نۇربەك پەداگوگتاردى دايىنداۋ ماسەلەسى جايلى ايتتى، دەپ حابارلايدى اlmaty-akshamy.kz.
«پەداگوگتارعا دەگەن سۇرانىس جىلدان جىلعا ارتىپ كەلە جاتىر. وقۋ-اعارتۋ مينيسترلىگىنىڭ مالىمەتىنشە، 2023 جىلى مۇعالىمدەرگە دەگەن قاجەتتىلىك 3 مىڭنان استام ادامدى قۇرايدى. مينيسترلىك وسى كادر تاپشىلىعى ماسەلەسىن جان-جاقتى زەردەلەدى. ءبىزدىڭ الداعى 4 جىلدا ءبىتىرىپ شىعاتىن تۇلەكتەرمەن پەداگوگتارعا دەگەن سۇرانىستى قامتاماسىز ەتەمىز دەگەن بولجام بار. تەك كەلەسى جىلى عانا پەداگوگ تاپشىلىعى تۋىنداۋى مۇمكىن. ءبىراق ءبىز ونى بيىلعى ءبىتىرۋشى تۇلەكتەردىڭ جانە ماگيستراتۋرا تۇلەكتەرىنىڭ ەسەبىنەن قامتاماسىز ەتەمىز. وسىلايشا ءبىز پەداگوگيكالىق كادرلاردىڭ قاجەتتىلىگىن تولىعىمەن جابامىز»، - دەدى ول.
ساياسات نۇربەك اتاعانداي، وسى سالاداعى گرانت سانى 15 923-كە جەتكەن.
«مەملەكەت باسشىسىنىڭ تاپسىرمالارىن جۇزەگە اسىرۋ اياسىندا پەداگوگيكالىق جوعارى وقۋ ورىندارىن اككرەديتتەۋ ستاندارتى مەن 2029 جىلعا دەيىنگى جوعارى ءبىلىم مەن عىلىمدى دامىتۋ تۇجىرىمداماسى بەكىتىلدى. پەداگوگيكالىق باعىتتار بويىنشا گرانتتار سانى سوڭعى جىلدارى بىرنەشە ەسە ءوسىپ، 15 923 بىرلىككە جەتتى. ولاردىڭ قۇنى ەكى ەسەگە ءوستى. ستۋدەنتتىك شاكىرتاقى دا ءوستى. سونىمەن قاتار مۇعالىمدىك ماماندىقتارعا قابىلداۋ تالاپتارى كۇشەيتىلدى. پەداگوگيكالىق جوعارى وقۋ ورىندارىنىڭ ءبىلىم بەرۋ باعدارلامالارىن جاڭارتۋ بويىنشا جۇمىس جالعاسۋدا، بۇگىندە ونىڭ 72%-ى جاڭارتىلدى. جالپى، وسى جانە باسقا دا جۇرگىزىلىپ جاتقان وزگەرىستەر پەداگوگيكالىق كادرلاردى دايارلاۋ ساپاسىن ارتتىرۋعا جانە ولاردىڭ زامان تالابىنا بەيىمدەلۋىنە باعىتتالعان»، - دەدى مينيستر.