بۇل تۋرالى ىشكى ىستەر مينيسترلىگىنىڭ رەسمي وكىلى شۇعىلا تۇرلىبەك ايتتى.
ءىىم «STOP ترافيك» جەدەل الدىن الۋ ءىس-شاراسىنىڭ قورىتىندىسىن جاريا ەتتى، دەپ حابارلايدى Almaty-akshamy.kz
«وپەراسيانىڭ 3 كۇنىندە پوليسەيلەر ادام ساۋداسىنا بايلانىستى 47 قىلمىستى انىقتادى. ونىڭ ىشىندە – جۇمىسقا جەگۋ ماقساتىندا زاڭسىز باس بوستاندىعىنان ايىرۋدىڭ 3 فاكتىسى، 10 ادام ساۋداسى، ونىڭ ىشىندە 5ء-ۋى كامەلەتكە تولماعاندار، 7 جەزوكشەلىكپەن اينالىسۋعا تارتۋ فاكتىسى، ونىڭ 3ء-ى كامەلەتكە تولماعاندارعا قاتىستى جانە 27 پريتون ۇستاۋ مەن جەڭگەتايلىق فاكتىلەرى. جەزوكشەلىكپەن اينالىسۋعا ءۇي-جايلار بەرگەنى جانە جەڭگەتايلىق ءۇشىن 30 اكىمشىلىك قۇقىق بۇزۋشىلىق جانە قوعامدىق ورىنداردا ءتيىسۋ فاكتىسى بويىنشا 453 قۇقىق بۇزۋشىلىق تىركەلدى»، - دەدى ول.
رەسمي وكىلدىڭ دەرەگىنشە، الماتى وبلىسىندا كامەلەتكە تولماعانداردى ساۋدالاۋ فاكتىسى انىقتالعان. وبلىستىڭ 39 جاستاعى تۇرعىنى ءوزىنىڭ جاڭا تۋعان ۇلىن ساتىپ جىبەرگەنى بەلگىلى بولدى. بۇل دەرەك 2021 جىلدىڭ جەلتوقسانىندا ورىن العان. ايەل بالاسىن ەرلى-زايىپتى جۇپقا زاڭسىز اسىراپ الۋ ماقساتىندا جارتى ميلليون تەڭگەگە ساتقان.
ال قاراعاندى وبلىسىندا ەڭبەككە ەرىكسىز جەگۋ فاكتىسى انىقتالدى. شارۋا قوجالىعىنىڭ باسشىسى بىرنەشە جىل بويى زورلىق-زومبىلىقپەن، سونداي-اق وزىنە قارىز ەكەنىن پايدالانىپ، 52 جانە 30 جاستاعى ەكى تۇرعىندى جۇمىسقا سالعان. ەر ادامدار ءۇي شارۋاشىلىعىمەن، تەحنيكانى جوندەۋمەن جانە مال كۇتىمىمەن اينالىسۋعا ءماجبۇر بولعان. قاشۋعا تىرىسقاندا ولار قوجالىققا قايتا قايتارىلىپ، جازالانىپ وتىرعان. شارۋا قوجالىعىنا جاقىن تراسسا 65 شاقىرىم جەردە ورنالاسقان. قازىرگى ۋاقىتتا ەڭبەككە ەرىكسىز جەگۋ ماقساتىندا زاڭسىز باس بوستاندىعىنان ايىرعانى ءۇشىن قىلمىستىق ءىس قوزعالىپ، تەرگە جۇرگىزىلىپ جاتىر.