الماتى پوليسياسىنىڭ قىزمەتكەرلەرى قالا تۇرعىندارىنا كونسەرت ۇيىمداستىردى.
اشىق اسپان استىنداعى كونسەرت قازاقستان پوليسياسى كۇنىنە وراي ۇيىمداستىرىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
بۇل كەشتە قالانىڭ پوليسيا دەپارتامەنتى ءانسامبلىنىڭ سوليستەرى بەلگىلى حالىقتىق، پاتريوتتىق جانە ەسترادالىق شىعارمالاردى ورىندادى. كورەرمەندەر وزدەرىنە تانىس اۋەندەردى تىڭداپ، ءان ىرعاعىمەن راحاتتانا بيلەدى.
«بۇگىن قازاقستان پوليسياسى كۇنى قارساڭىندا پد ءانسامبلىنىڭ ارتىستەرى مەن قىزمەت وكىلدەرى مازمۇندى كونسەرتتىك باعدارلاما، سونداي-اق جەدەل قيمىلدايتىن ارنايى جاساعىنىڭ جاۋىنگەرلەرى مەن كينولوگ-ماماندار قىزمەتتىك-ىزكەسۋشى يتتەرمەن تاماشا قويىلىمىن ۇيىمداستىردى. جۇزدەگەن ازامات اۋقىمدى قوزعالىستىڭ بەلسەندى قاتىسۋشىلارى بولدى، سول ارقىلى ءبىزدىڭ باستامامىزدى قولدادى. ازاماتتار پوليسيا قىزمەتكەرلەرىنىڭ جاقسى فيزيكالىق دايىندىعى جانە ولاردىڭ شىعارماشىلىق قابىلەتتەرىن ءوز كوزدەرىمەن كوردى. وسى قاسيەتتەردىڭ بارلىعى ءبىزدىڭ جەدەل-قىزمەتتىك مىندەتتەرىمىزدى ويداعىداي ورىنداۋعا وڭ اسەرىن تيگىزىپ جاتىر»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ولجاس مىرزابەكوۆ.
الماتى پوليسيا دەپارتمەنتىنىڭ ءانسامبلى 1963 جىلى قۇرىلعان. مىنە، 60 جىلدان بەرى بۇل ۇجىم مۋزىكالىق جانە پوەتيكالىق ونەرى ارقىلى جەكە قۇرامدى قىزمەتتىك جانە ازاماتتىق بورىشقا ادالدىققا، تۋعان جەرىنە دەگەن سۇيىسپەنشىلىككە تاربيەلەۋگە، بولىمشەلەردە سالاۋاتتى مورالدىق-پسيحولوگيالىق احۋالدى، بەرىك قىزمەتتىك ءتارتىپتى قالىپتاستىرۋعا، قىزمەتكەرلەردىڭ ادامگەرشىلىك قاسيەتتەرى مەن ەستەتيكالىق تالعامى بيىك ادامدى قالىپتاستىرۋعا اتسالىسىپ كەلەدى.