«STOP ترافيك» جەدەل الدىن الۋ ءىس-شاراسى بارىسىندا ادام ساۋداسىنا بايلانىستى 47 قىلمىس انىقتالدى. بۇل تۋرالى ىشكى ىستەر مينيسترلىگىنىڭ رەسمي وكىلى شۇعىلا تۇرلىبەك ايتتى، دەپ حابارلايدى Almaty-akshamy.kz.
«ادام ساۋداسى جانە ونىمەن تەڭ كەلەتىن ەڭبەكتى قاناۋ – ادام قۇقىعىن بۇزاتىن وزەكتى پروبلەما. بۇل ماسەلە الەم ەلدەرىندە عانا ەمەس، قازاقستاندا دا الاڭداۋشىلىق تۋدىرادى. ءىىم وسى باعىت بويىنشا جۇيەلى جۇمىس جۇرگىزۋدە. اتاپ ايتقاندا، ءماجبۇرلى ەڭبەكتى انىقتاۋ ءۇشىن شارۋا، فەرمەر قوجالىقتارى، قۇرىلىس وبەكتىلەرى، جىنىستىق پايدالانۋ فاكتىلەرىنىڭ جولىن كەسۋ ءۇشىن مونشا كەشەندەرى مەن قوناق ۇيلەر تەكسەرىلىپ، ينتەرنەت جەلىسى دە باقىلانادى»، - دەدى ول مينيسترلىكتىڭ باسپا ءسوز قىزمەتى الاڭىندا وتكەن بريفينگتە.
رەسمي وكىلدىڭ ايتۋىنشا، ەل اۋماعىندا ىشكى ىستەر ورگاندارىنىڭ ۇيىمداسقان قىلمىسقا قارسى كۇرەس بولىمشەلەرى وتكەن اپتادا «STOP ترافيك» جەدەل الدىن الۋ ءىس-شاراسىن وتكىزدى، دەپ جازدى قازاقپارات.
«وپەراسيانىڭ 3 كۇنىندە پوليسەيلەر ادام ساۋداسىنا بايلانىستى 47 قىلمىستى انىقتادى. ونىڭ ىشىندە – جۇمىسقا جەگۋ ماقساتىندا زاڭسىز باس بوستاندىعىنان ايىرۋدىڭ 3 فاكتىسى، 10 ادام ساۋداسى، ونىڭ ىشىندە 5ء-ۋى كامەلەتكە تولماعاندار، 7 جەزوكشەلىكپەن اينالىسۋعا تارتۋ فاكتىسى، ونىڭ 3ء-ى كامەلەتكە تولماعاندارعا قاتىستى جانە 27 پريتون ۇستاۋ مەن جەڭگەتايلىق فاكتىلەرى. جەزوكشەلىكپەن اينالىسۋعا ءۇي-جايلار بەرگەنى جانە جەڭگەتايلىق ءۇشىن 30 اكىمشىلىك قۇقىق بۇزۋشىلىق جانە قوعامدىق ورىنداردا ءتيىسۋ فاكتىسى بويىنشا 453 قۇقىق بۇزۋشىلىق تىركەلدى»، - دەدى شۇعىلا تۇرلىبەك.
ونىڭ دەرەگىنشە، الماتى وبلىسىندا كامەلەتكە تولماعانداردى ساۋدالاۋ فاكتىسى انىقتالدى. وبلىستىڭ 39 جاستاعى تۇرعىنى ءوزىنىڭ جاڭا تۋعان ۇلىن ساتىپ جىبەرگەنى بەلگىلى بولدى. بۇل دەرەك 2021 جىلدىڭ جەلتوقسانىندا ورىن العان. ايەل بالاسىن ەرلى-زايىپتى جۇپقا زاڭسىز اسىراپ الۋ ماقساتىندا جارتى ميلليون تەڭگەگە ساتقان.
«قاراعاندى وبلىسىندا ەڭبەككە ەرىكسىز جەگۋ فاكتىسى انىقتالدى. شارۋا قوجالىعىنىڭ باسشىسى بىرنەشە جىل بويى زورلىق-زومبىلىقپەن، سونداي-اق وزىنە قارىز ەكەنىن پايدالانىپ، 52 جانە 30 جاستاعى ەكى تۇرعىندى جۇمىسقا سالعان. ەر ادامدار ءۇي شارۋاشىلىعىمەن، تەحنيكانى جوندەۋمەن جانە مال كۇتىمىمەن اينالىسۋعا ءماجبۇر بولعان. قاشۋعا تىرىسقاندا ولار قوجالىققا قايتا قايتارىلىپ، جازالانىپ وتىرعان. شارۋا قوجالىعىنا جاقىن تراسسا 65 شاقىرىم جەردە ورنالاسقان. قازىرگى ۋاقىتتا ەڭبەككە ەرىكسىز جەگۋ ماقساتىندا زاڭسىز باس بوستاندىعىنان ايىرعانى ءۇشىن قىلمىستىق ءىس قوزعالدى، تەرگەۋ جۇرگىزىلۋدە. جابىرلەنۋشىلەرگە قاجەتتى كومەك كورسەتىلۋدە. قوستاناي وبلىسىندا 38 جاستاعى قالا تۇرعىنى ۇستالدى، ول ءبىر اي بويى الداۋ جانە بوپسالاۋ جولىمەن كوللەدجدە وقيتىن قىزدى جەزوكشەلىكپەن اينالىسۋعا تارتىپ، ونى جالدامالى پاتەرلەردە كليەنتتەرمەن جولىقتىرىپ وتىرعان. جابىرلەنۋشى تۋىستارىنا تاپسىرىلدى. قىلمىستىق كودەكستىڭ 134ء-شى «كامەلەتكە تولماعاندى جەزوكشەلىكپەن اينالىسۋعا تارتۋ» بابى بويىنشا قىلمىستىق ءىس قوزعالدى»،- دەدى رەسمي وكىل.