باۋىرجان الدابەرگەن ۇلى ءۇشىن ءار تاڭ وتا جاساۋمەن باستالادى
سوڭعى اقپارعا سايكەس، ەلدەگى 2 ميلليون ادام جۇرەك-قان تامىرلارى اۋرۋىنا شالدىققان، دەپ حابارلايدى Almaty-akshamy.kz Almaty.tv-گە سىلتەمە جاساپ.
باۋىرجان الدابەرگەن ۇلى ءۇشىن ءار تاڭ وتا جاساۋمەن باستالادى. 10 جىلدا ول 2000-نان اسا ءتۇرلى دەڭگەيدەگى وپەراسيالارعا قاتىسقان. اتالعان سالا بويىنشا الدىڭعى قاتاردا جۇرگەن مامان جۇرەككە بۇرىن جاسالماعان ءمينييزۆازيۆتى وتانى ەنگىزگەن. جالپى، اۋىر پاتولوگياداعى ناۋقاستار الدىنا كوپ كەلەتىن ابزال جان جۋىردا عانا كۇردەلىلىكتىڭ 6-دەڭگەيىندەگى وپەراسياسىن وتكىزىپتى.
«كەشكى ساعات 18:00 ناۋقاستى وتاعا الدىق، كەلەسى كۇنگى تاڭعى 7:00-دە ءبىتتى. ءبىز ءۇشىن بۇل – جەڭىس، سەبەبى 12-13 ساعاتقا سوزىلعان وتا ءساتتى اياقتالىپ، ناۋقاس ءبىر اپتادان كەيىن ۇيىنە شىعارىلدى»، – دەدى ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعى كارديوحيرۋرگيا ءبولىمىنىڭ مەڭگەرۋشىسى باۋىرجان راقىشيەۆ.
«ءتيىستى كومەك دەر كەزىندە كورسەتىلمەسە، مۇنداي جاعدايدا ناۋقاستاردىڭ 95 پايىزىن قۇتقارۋ مۇمكىن بولمايدى» دەيدى مامان. سوندىقتان، ءبىر ادامدى امان الىپ قالۋ ءۇشىن ءبىر ەمەس، بىرنەشە دارىگەر بىلگەنىن ورتاعا سالادى، قولدان كەلگەنىن جاسايدى. مىندەتىمىز دەپ بىلەتىن ولاردىڭ ەڭبەگىن كوپشىلىك ەرلىككە بالايدى.
قازىرگى تاڭدا الەمدىك تاجىريبەدە جۇرەككە جاسالۋى ءتيىس وتانىڭ ءبارى قازاقستاندا دا جۇزەگە اسىپ جاتىر. بۇل رەتتە ارينە، مامانداردىڭ بىلىكتىلىگى نەگىزگى ءرول وينايدى. ال ناۋقاستىڭ ايىعىپ كەتۋىنە كاسىبي شەبەرلىكپەن بىرگە، ادامي فاكتوردىڭ دا اسەرى زور.
«ەڭ الدىمەن، دارىگەر بولاتىن ادامنىڭ بويىندا ونىڭ ادامگەرشىلىك قاسيەتى بولۋى، ادامعا جانى اشۋى كەرەك. ماسەلە سوندا. بىلەسىزدەر، دارىگەرلەردە ناۋقاستى ۇلتقا، ۇلىسقا، دىنگە، جىنىسقا ءبولۋ دەگەن جوق. ادامزات بالاسىنىڭ بارلىعىن ەمدەۋگە ءبىز دايىنبىز»، – دەدى ا.ن.
سىزعانوۆ اتىنداعى ۇلتتىق عىلىمي حيرۋرگيا ورتالىعى كارديوحيرۋرگيا ءبولىمىنىڭ مەڭگەرۋشىسى باۋىرجان راقىشيەۆ.
بۇگىندە قازاقستان دارىگەرلەرى ءدال وسى جۇرەك اۋرۋلارىنا وتا جاساۋدا شەتەلدىك ماماندارمەن ءوزارا بايلانىس ورناتىپ، وزىق تەحنولوگيالاردى ەلگە اكەلۋدە دە كوشتەن قالماي كەلەدى. ال، ادامزاتتىڭ اماندىعى، جۇمىر جەردىڭ تۇتاستىعى ءۇشىن قىزمەت قىلىپ جۇرگەندەردىڭ ەڭبەگىن ەلەۋ – ەل مىندەتى.