كوميسسياعا 681 ۇسىنىس تۇسكەن.
ولاردى جەرگىلىكتى ونوماستيكالىق كوميسسيالاردىڭ قاراۋىنا اكىمدىكتەرگە جىبەرۋ تۋرالى شەشىم قابىلداندى، دەپ حابارلايدى Almaty-akshamy.kz
رەسپۋبليكالىق ونوماستيكا كوميسسياسىنىڭ وتىرىسى ءوتىپ، قورىتىندىسى بويىنشا وڭتۇستىك قازاقستان پەداگوگيكالىق ۋنيۆەرسيتەتىنە كورنەكتى مەملەكەت جانە قوعام قايراتكەرى، عالىم-ەتنوگراف، تاريحشى، اكادەميك وزبەكالى جانىبەكوۆتىڭ ەسىمىن بەرۋ تۋرالى شەشىم قابىلداندى.
كەزدەسۋدە قازاقستاننىڭ وڭىرلەرىندەگى 18 وقۋ ورنىن جانە كوكشەتاۋ، قوسشى، ستەپنوگورسك (اقمولا وبلىسى) ارىس (تۇركىستان وبلىسى) جانە تالدىقورعان (جەتىسۋ وبلىسى) قالالارىنداعى 69 كوشەنى قايتا اتاۋ ماسەلەسى تالقىلاندى.
"اتاۋلاردىڭ ءبىر بولىگى قايتا قاراۋعا باعىتتالعان. بۇل «گۇلدەر»، «اسۋ»، «تىرشىلىك» جانە «اينالايىن». وتىرىسقا قاتىسۋشىلار كوشە اتاۋلارى ءوڭىردىڭ تاريحي جانە گەوگرافيالىق ەرەكشەلىكتەرىن كورسەتىپ، ناقتى ماعىناعا يە بولۋى كەرەك دەگەن پىكىرگە كەلدى. جاقىندا ۇلتتىق قۇرىلتايدىڭ II وتىرىسىندا قاسىم-جومارت توقايەۆ ءومىربايانى بىرەۋدىڭ جەكە مۇددەسى مەن قالاۋى ءۇشىن ماقساتتى تۇردە ميفولوگيالانعان كەڭەستىك كەزەڭدەگى قايراتكەرلەردىڭ ەسىمدەرىن ءتۇرلى نىسانعا بەرۋ تاجىريبەسىن توقتاتۋدى ايتتى. پرەزيدەنت ونوماستيكا سالاسىندا ءتارتىپ ورناتۋدى جانە وڭىرلىك ەرەكشەلىكتەردى دە، جالپىۇلتتىق باسىمدىقتاردى دا ەسكەرە وتىرىپ، بارلىق ءراسىمدى رەگلامەنتتەۋدى تاپسىرعان ەدى. ءدال وسى ماقساتتا مادەنيەت جانە سپورت مينيسترلىگى كورنەكتى قايراتكەرلەر مەن تاريحي تۇلعالاردىڭ «تاريحي تۇلعالار» ءتىزىمىن وزەكتەندىرۋ بويىنشا جۇمىس جۇرگىزۋدە، سونىڭ نەگىزىندە نىساندار مەن كوشەلەرگە جاڭا اتاۋلار بەرىلەدى"، - دەدى مادەنيەت جانە سپورت ءمينيسترى اسحات ورالوۆ.
اتاپ ايتقاندا:
اقتاۋ قالاسىنداعى №28 جالپى ءبىلىم بەرەتىن مەكتەپكە ۇلى اعارتۋشى، عالىم، اقىن جانە پۋبليسيست احمەت بايتۇرسىن ۇلىنىڭ ەسىمى بەرىلدى. «ۇلت ۇستازىنىڭ» ەسىمىمەن قوستاناي اۋدانىنىڭ ءبىلىم ءبولىمىنىڭ مەملەكەتتىك تىلدە وقىتاتىن زارەچنايا جالپى ءبىلىم بەرەتىن مەكتەبى، سونداي-اق جەتىسۋ وبلىسى الاكول اۋدانىنىڭ ءۇشارال قالاسىنىڭ №1 ورتا مەكتەبى اتالادى.
قوستاناي اۋدانىنىڭ ءبىلىم ءبولىمىنىڭ سوۆحوز جالپى ءبىلىم بەرەتىن مەكتەپ اتاۋى كورنەكتى جازۋشى، اقىن جانە قوعام قايراتكەرى سپانديار كوبەيەۆتىڭ قۇرمەتىنە وزگەرتىلەدى.
جەتىسۋ وبلىسى الاكول اۋدانى ءۇشارال قالاسىنىڭ №2 ورتا مەكتەبى قازاق ادەبيەتىنىڭ كلاسسيگى، اقىن، جازۋشى، دراماتۋرگ جانە جۋرناليست ءىلياس جانسۇگىروۆتىڭ ەسىمىمەن اتالادى.
جەتىسۋ وبلىسى الاكول اۋدانى بەسكول ستانسياسىنىڭ № 14 ورتا مەكتەبى اتاۋى الەمگە ايگىلى قازاق جازۋشىسى مۇحتار اۋەزوۆتىڭ قۇرمەتىنە وزگەرتىلەدى.
جەتىسۋ وبلىسى الاكول اۋدانى دوستىق كەنتىنىڭ № 11 ورتا مەكتەبى كەڭەس وداعىنىڭ باتىرى جانە مايدانگەر-جازۋشى باۋىرجان مومىش ۇلىنىڭ ەسىمىمەن اتالادى.
جەتىسۋ وبلىسىنداعى ءۇشارال قازاق گيمنازياسىنا ۇلى اعارتۋشى جانە پەداگوگ ىبىراي ءالتىنساريننىڭ ەسىمى بەرىلەدى.
يدەولوگيالىق تۇرعىدا ەسكىرگەن، قايتالاناتىن اتاۋلارى بار كوشەلەر مەن باسقا دا ورىندارعا كەلcەك، كوكشەتاۋ قالاسىندا «ريەۆوليۋسيا ءۇشىن كۇرەسكەرلەرگە ارنالعان ساياباق» «الاش ارىستارى» دەپ وزگەرتىلىپ، دميترييەۆ كوشەسى اتى اڭىزعا اينالعان داۋلەتكەرەي كۇيشىنىڭ قۇرمەتىنە وزگەرتىلەدى.
اقمولا وبلىسىنىڭ قوسشى قالاسىنداعى 20-شى شاعىن اۋداننىڭ بىرنەشە كوشەسىنە امىرە قاشاۋبايەۆ، جاھانشا دوسمۇحامەدوۆ، نۇرعيسا تىلەندييەۆ، جۇمەكەن ناجىمەدەنوۆ، روزا باعلانوۆا، شوقىر بولتەك ۇلى، ساعادات نۇرماعامبەتوۆ، ءابىش كەكىلبايەۆ، فاريزا وڭعارسىنوۆا، باتىرحان شوكەنوۆ سياقتى قايراتكەر تۇلعالاردىڭ ەسىمدەرى بەرىلدى.
ستەپنوگورسك قالاسىندا پاركوۆايا جانە ستەپنايا كوشەلەرى اتى اڭىزعا اينالعان پالۋان قاجىمۇقان مەن كەڭەس وداعىنىڭ باتىرى مانشۇك مامەتوۆانىڭ قۇرمەتىنە وزگەرتىلەدى.
تالدىقورعان قالاسىنىڭ بىرنەشە كوشەسىنە قازاق حاندىعىنىڭ نەگىزىن قالاۋشى كەرەي مەن جانىبەك حانداردىڭ، تۇمانباي مولداعالييەۆ، ساعادات نۇرماعانبەتوۆ سياقتى تۇلعالاردىڭ ەسىمدەرى بەرىلدى.
تۇركىستان وبلىسىنىڭ ارىس قالاسىندا روزا باعلانوۆانىڭ، قازاقستاننىڭ حالىق جازۋشىسى شەرحان مۇرتازانىڭ جانە ءارتۇرلى گەوگرافيالىق ورىنداردىڭ: شارىن، سارىارقا، ۇلىتاۋ، جيدەباي، سارايشىق جانە ت. ب. اتىنداعى كوشەلەر پايدا بولادى.
مادەنيەت كوميتەتىنە ادىستەمەلىك ۇسىنىمدارعا قاجەت وزگەرىستەر ەنگىزۋ جونىندە تاپسىرمالار بەرىلەدى.