ەلىمىز تەك تۇتىنۋشى ەمەس، جاڭا دۇنيەنى ءوندىرۋشى ۇلت اتانۋى كەرەك. بۇل تۋرالى ەلوردادا وتكەن ۇلىقتاۋ راسىمىندە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«ءبىز وركەنيەتتىڭ العى شەبىندەگى مەملەكەتكە اينالۋ ءۇشىن تەك ۇيرەنەتىن ەمەس، وزگەگە ۇيرەتەتىن ۇلتقا اينالۋىمىز قاجەت. سونداي-اق، تەك تۇتىنۋشى ەمەس، جاڭا دۇنيەنى ءوندىرۋشى ۇلت اتانۋىمىز كەرەك. وعان حالقىمىزدىڭ الەۋەتى، دارىنى، قارىم-قابىلەتى جەتەدى»، - دەدى قاسىم-جومارت توقايەۆ.
سونىمەن قاتار پرەزيدەنت جاستاردىڭ ءبىلىم الۋىنا ەرەكشە نازار اۋدارۋ كەرەك ەكەنىن اتاپ ءوتتى.
«مەن ءبىزدىڭ جاستارىمىزدىڭ ۇشقىر جانە وزىق ويلى ەكەنىن ماقتان ەتەمىن. سول سەبەپتى، ماعجان اقىننىڭ «مەن جاستارعا سەنەمىن» دەگەن ءسوزىن ۇنەمى ايتامىن. شىن مانىندە، ءبارىمىز جاستارىمىزدى قولداۋىمىز كەرەك. ويتكەنى، وسكەلەڭ ۇرپاق قانا ەلىمىزدى جارقىن بولاشاققا باستايدى. ءبىراق، جاستار جەتىستىككە جەتۋ ءۇشىن كوپ ەڭبەكتەنۋى كەرەك. جاڭا ءبىلىم الۋعا، تىڭ تاجىريبە جيناۋعا ۇمتىلعان ءجون. سوندا جاستارىمىز ءوز كاسىبىنىڭ حاس شەبەرى اتانادى. ءاردايىم سۇرانىسقا يە بولادى، قوعامدا سىيلى بولادى. مىنە، وسىلاي ءومىر سۇرگەن ادام ەشقاشان، ەشتەڭەدەن ۇتىلمايدى»، - دەدى مەملەكەت باسشىسى.