قوعامدا جاڭا قۇندىلىقتار ورنىقتىرىپ، جاقسى قاسيەتتەرگە يە بولا الماساق، رەفورمانىڭ ءبارى بەكەر. بۇل تۋرالى ۇلىقتاۋ راسىمىندە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«ءبىر سوزبەن ايتسام، كاسىبيلىك، ادالدىق جانە قاراپايىمدىلىق ءبىزدىڭ باستى قاعيداتتارىمىز بولۋعا ءتيىس. قوعامدا جاڭا قۇندىلىقتار ورنىقتىرىپ، جاقسى قاسيەتتەرگە يە بولا الماساق، رەفورمانىڭ ءبارى بەكەر. كوك بايراعىمىز، ءتولقۇجاتىمىز جانە مەملەكەتتىك ءتىلىمىز ءبىزدىڭ ءبىرتۇتاس حالىق ەكەنىمىزدى بىلدىرەدى»، - دەدى قاسىم-جومارت توقايەۆ.
وسى ورايدا پرەزيدەنت بابالارىمىز ءبىرتۇتاس ەل بولىپ، ەۋرازيا تورىندە داڭقتى شەجىرەسىن ات تۇياعىمەن جازعانىن، التىن وردا مەن قازاق حاندىعى سياقتى مەملەكەتتەر قۇرعانىن ەسكە سالدى.
«سونداي-اق، حالقىمىز ەل باسىنا كۇن تۋعان كۇردەلى ساتتەردە ازاتتىعى ءۇشىن ارپالىستى. ايگىلى حاندارىمىزدىڭ، باتىرلارىمىزدىڭ جانە ۇلت قايراتكەرلەرىنىڭ ەرلىگى – وسىنىڭ ايقىن كورىنىسى»، - دەدى مەملەكەت باسشىسى.