ەلىمىز حالىقارالىق جۇك تاسىمالىنا تالاپتى كۇشەيتپەك

20 اقپاندا حالىقارالىق جۇك اۆتوتاسىمالىنا رۇقسات بەرەتىن جاڭا ەرەجە كۇشىنە ەنەدى.

ەنگىزىلگەن وزگەرىستەر حالىقارالىق جۇك تاسىمالى مەن وزگە دە راسىمدەردى جۇزەگە اسىرۋعا رۇقسات بەرەتىن تالاپتاردى كۇشەيتۋدى كوزدەيدى، دەپ حابارلايدى Almaty-akshamy.kz

قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترىنىڭ 2022 جىلدىڭ 13 جەلتوقسانداعى №715 بۇيرىعىمەن ("ق ر كولىك جانە كوممۋنيكاسيا ءمينيسترىنىڭ جانە ق ر ينۆەستيسيالار جانە دامۋ ءمينيسترىنىڭ م.ا. كەيبىر بۇيرىقتارىنا وزگەرىستەر ەنگىزۋ تۋرالى") تاسىمالداۋشىلارعا حالىقارالىق جۇك اۆتوتاسىمالىن ىسكە اسىرۋعا رۇقسات بەرەتىن ەرەجەلەر مەن قازاقستان رەسپۋبليكاسىندا اۆتوموبيلمەن تاسىمالداۋدىڭ رۇقسات بەرۋ جۇيەسىنىڭ حالىقارالىق باعىتتاعى قولدانۋ ەرەجەلەرىنە وزگەرىستەر ەنگىزىلدى.

بۇل قۇجات حالىقارالىق جۇك اۆتوتاسىمالىنىڭ ەلىمىزدەگى نارىعىن دامىتۋعا، سونداي-اق ىشكى نارىق پەن وتاندىق تاسىمالداۋشىلاردىڭ مۇددەلەرىن قورعاۋعا باعىتتالعان.

اتاپ ايتقاندا، وسى بۇيرىق ارقىلى اۆتوكولىك قۇرالدارىنا رۇقسات بەرۋ كارتوچكالارىنىڭ قولدانىلۋ مەرزىمى بەلگىلەنىپ، شەتەلدىك رۇقساتتى الۋدىڭ ءتارتىبى ايقىندالدى (رۇقسات بەرۋ كۋالىگى مەن رۇقسات بەرۋ كارتوچكاسى "شەتەلدىك رۇقسات بەرۋ قۇجاتىن قولدانۋ" جانە "قولدانباۋ" ساناتتارىنا بولىنەدى).

سونداي-اق رۇقسات كۋالىگى مەن رۇقسات كارتوچكاسىنىڭ قولدانىلۋىن شەكتەپ، ولاردى توقتاتۋمەن بىرگە كومپانيالارعا شەتەلدىك رۇقسات قۇجاتتارىن حالىقارالىق جۇك اۆتوتاسىمالىن ىسكە اسىرۋعا بەرۋ مەن تاعى دا باسقا تالاپتار ەنگىزىلىپ وتىر.