الماتى قالاسى سپورت باسقارماسىنىڭ №9 وليمپيادالىق رەزەرۆتەگى مامانداندىرىلعان بالالار-جاسوسپىرىمدەر مەكتەبىندە جوندەۋ جۇمىستارىنان كەيىن گيمناستيكامەن اينالىسۋعا ارنالعان جاڭا سپورت زالى اشىلدى.
سپورت زالدا 800-دەن استام بالا سپورتپەن اينالىسادى. الەمدىك دەڭگەيدەگى وليمپيادالار مەن سپورتتىق جارىستاردىڭ بولاشاق جەڭىمپازدارى جاتتىعاتىن بولادى.
اشىلۋ سالتاناتىنا قازاقستان گيمناستيكا فەدەراسياسىنىڭ ۆيسە-پرەزيدەنتى م.ەسكەندىروۆ، الماتى قالاسى ءماسليحاتىنىڭ بۇرىنعى دەپۋتاتى ە.قاسىموۆ، اۋەزوۆ اۋدانى اكىمىنىڭ ورىنباسارى ق.ساعىندىقوۆ، «تايشان» كومپانياسىنىڭ وكىلى جانگ لي قاتىستى.
«تايشان» كومپانياسىنىڭ جابدىقتارى بۇكىل الەمگە تانىمال. «تايشان» فيرماسىنىڭ جابدىقتارىندا ءقازىردىڭ وزىندە الەم جانە ازيا چەمپيوناتتارى رەتىندە الەمدىك اۋقىمداعى ءىرى جارىستار وتكىزىلۋدە. حالىقارالىق گيمناستيكا فەدەراسياسىمەن تانىلعان جانە سەرتيفيكاتتالعان.
«بۇگىن سپورتشىلار، جاتتىقتىرۋشىلار مەن قازاقستان گيمناستيكا فەدەراسياسى ءۇشىن قۋانىشتى كۇن. ءبىزدىڭ كومپانيا 45 جىلدان بەرى سپورتقا ارنالعان جابدىقتاردى وندىرەدى. بۇل سپورت مەكتەبىنەن قازاقستاننىڭ اتىن شىعاراتىن سپورت مايتالماندارى شىعاتىنىنا سەنىم مول»، - دەدى كومپانيا وكىلى جانگ لي.
№9 وليمپيادالىق رەزەرۆتەگى مامانداندىرىلعان بالالار-جاسوسپىرىمدەر مەكتەبىنىڭ جانىنداعى سپورت زال 1974 جىلى سالىنعان. زالدا اشىلعاننان بەرى العاش رەت جوندەۋ جۇرگىزىلىپ، گيمناستيكالىق جابدىقتار اۋىستىرىلدى. جاڭا سپورت زالىندا ۇلتتىق قۇرامالاردىڭ سپورتتىق، باتۋتتىق گيمناستيكا جانە سپورتتىق اكروباتيكا بويىنشا جاتتىعۋلارىن وتكىزۋ جوسپارلانۋدا.
