ەلىمىز ەرەكشە بالالارعا ارنالعان ونەر جوباسىن جاريالادى

تالانتتى ەرەكشە بالالاردىڭ ساحناعا شىعىپ، ونەر كورسەتۋ مۇمكىندىگى بار.

«ارمان اسۋلارى» اتتى جاڭا جوبادا ەرەكشە بالالار ونەر جۇلدىزدارىمەن بىرگە ءان ايتاتىن بولادى، دەپ حابارلايدى Almaty-akshamy.kz.

«ارمان اسۋلارى» اتتى جاڭا جوبا تۋرالى روزا باعلانوۆا اتىنداعى «قازاقكونسەرت» مەملەكەتتىك كونسەرتتىك ۇيىمى ديرەكتورىنىڭ شىعارماشىلىق قىزمەت بويىنشا ورىنباسارى سەرىك نۇرمولدايەۆ ءمالىم ەتتى.

«ارمان اسۋلارى» اتتى ەرەكشە بالالارعا ارنالعان ينكليۋزيۆتى جوبانى باستاعالى جاتىرمىز. ەلىمىز بويىنشا تالانتى بار ەرەكشە بالالاردى جيناپ، ساحناعا شىعۋىنا جاعداي جاسايمىز. سول سياقتى ولار ءبىزدىڭ ونەر جۇلدىزدارىمەن بىرگە ءان ايتاتىن بولادى. سونىمەن قاتار بىزدە «ورتەكە» اتتى قۋىرشاقتار تەاترى بار. اتالعان ونەر ۇجىمى بيىل يۋنەسكو-نىڭ تىزىمىنە ەندى. وسى ورايدا ەلىمىزدە قۋىرشاقتار فورۋمىن وتكىزۋ جوسپاردا بار. ودان بولەك، «استانا سازى» فولكلورلىق ەتنوگرافيالىق ءانسامبلى جۇمىس ىستەيدى. جەتەكشىسى باۋىرجان اقتايەۆ. وسى ۇجىم بيىل نەشە جىلعى ەڭبەكتەرىن جيناپ، العاش رەت البوم جاريالاعالى وتىر»، - دەدى سەرىك نۇرمولدايەۆ.

سونداي-اق، سپيكەر وتاندىق جاس كومپوزيتورلاردى قولداۋ ماقساتىندا «قازاقكونسەرت رەزيدەنسياسى» اتتى جوبانىڭ قولعا الىنىپ جاتقانى تۋرالى ايتتى.

«تاعى ءبىر جاڭالىعىمىز «الەم سازى» اتتى حالىقارالىق فەستيۆال وتكىزبەكپىز. وعان 10-نان استام ەلدەن وكىلدەرى قاتىسادى. شەتەلدىك ونەرپازدار 1 اپتا بويى كونسەرت وتكىزەدى. ۋاقىتى تۋرالى قوسىمشا حابارلانادى»، - دەيدى ول.