ەلىمىز ەلەكتر جارىعىن بەرىپ، ورنىنا سۋ الادى

سىردىڭ تومەنگى اعىسىنا كەلەتىن سۋ مولشەرى ارتادى.

ول ءۇشىن ەلىمىز الدىن الا كەلىسىلگەن مىندەتتەمەلەرىن ورىندادى. ەندى قىرعىزستان "توقتاعۇلدان"سەكۋندىنا 460 تەكشە مەتر سۋ جىبەرۋى ءتيىس. قازىرگى كورسەتكىش بۇدان ءسال كەم. جاعدايدى ەلىمىزدىڭ ەنەرگەتيكا مينيسترلىگى ءجىتى نازاردا ۇستاپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ. 

الماسادام ساتقالييەۆ تاشكەنتتە قىرعىزستاندىق جانە وزبەكستاندىق ارىپتەستەرىمەن كەزدەسىپ، ۆەگەتاسيالىق كەزەڭگە قاتىستى ماسەلەلەردى تالقىلادى. باۋىرلاس مەملەكەتتەر ەنەرگەتيكالىق رەسۋرس تاپشىلىعىنا بىرلەسىپ جول بەرمەۋگە ۋاعدالاستى. سوندىقتان قويمالارداعى تىرشىلىك ءنارىن بارىنشا ءتيىمدى پايدالانىپ، اۋىل شارۋاشىلىعىنا ساقتاپ قالۋدى ويلاستىرىپ جاتىر. ماسەلەن، قازاقستان قىرعىزستانعا قىركۇيەكتەن باستاپ كەلەر جىلدىڭ ساۋىرىنە دەيىن 1 جارىم ملرد كيلوۆاتت/ساعات ەلەكتر قۋاتىن جونەلتپەك. "سول ارقىلى "توقتاعۇلدان" جاز ايلارىندا قاجەتتى سۋ مولشەرىن الۋعا مۇمكىندىك تۋادى"، - دەيدى ماماندار.

«نارىن وزەنىنە كەلەتىن سۋدىڭ ازايۋىنا بايلانىستى قىرعىزستاننىڭ ەنەرگيا جۇيەسىنە قوسىمشا ەلەكتر ەنەرگياسىن جەتكىزۋدى تالقىلاپ جاتىرمىز. قىرعىز تاراپى بىزدەن 1،5 ملرد كيلوۆاتت-ساعات ەلەكتر قۋاتىن سۇراپ وتىر. قازاقستان بۇل سۇرانىستى تولىعىمەن ءوزى وتەمەك نيەتتە. جەتپەگەنىن رەسەي فەدەراسياسىنان الاتىن بولامىز. سونىڭ ناتيجەسىندە ءبىز «توقتاعۇلدا» ساقتالعان سۋ كولەمىن الامىز»، - دەيدى "KEGOC" اق جۇيەلىك وپەراتورى ديسپەچەرلىك ورتالىعىنىڭ ديرەكتورى ەرالى شىناسىلوۆ.