قازاقستاننىڭ ءبىرىنشى، الەمنىڭ 4-راكەتكاسى ەلەنا رىباكينا مايامي (اقش) WTA 1000 ءتۋرنيرىنىڭ ءۇشىنشى اينالىمىنا ءوتتى، دەپ حابارلايدى اlmaty-akshamy.kz.
جارىستىڭ 4-راكەتكاسى بولىپ تىركەلگەن قازاقستاندىق تەننيسشى ەكىنشى اينالىمدا دۇنيەجۇزىلىك رەيتينگىدە 91-ساتىدا تۇرعان دانيالىق كلارا تاۋسونمەن ويىن وتكىزدى.
وسىعان دەين قارسىلاستار ءبىر-اق رەت كەزدەسىپ، بەس جىل بۇرىن بوستادتا (شۆەسيا) قازاقستاندىق سپورتشى باسىم تۇسكەن ەدى.
بۇل جولى ءبىرىنشى پارتيادا تاۋسون برەيك جاساعانىمەن، رىباكينا ىزىنشە ەسەپتى تەڭەستىردى – 3:3. ءبىراق قازاقستاندىق تەننيسشى قارسىلاسىنىڭ قايتادان ەكى رەت برەيك جاساۋىنا مۇمكىندىك بەرىپ قويدى - 3:6.
ەكىنشىسىندە ەلەنا برەيكپەن العا شىقتى – 2:0. ءبىراق سەتكە دوپ بەرگەندە، تاۋسون برەيك جاساپ كەتتى – 5:5. دەگەنمەن رىباكينا ەكىنشى مۇمكىندىگىن ءمۇلت جىبەرگەن جوق – 7:5.
ءۇشىنشى، شەشۋشى پارتيانى سپورتشىلار برەيك الماسۋمەن باستادى – 1:1. سودان كەيىن رىباكينا 4:2 ەسەبىمەن العا كەتتى. اقىرى ءوزى دوپ بەرگەندە، ءۇشىنشى ماچبولىن پايدالانا ءبىلدى – 6:4.
ەكى ساعات 27 مينۋتقا سوزىلعان تارتىستى باسەكە بارىسىندا ەلەنا 5 ەيسپەن بىرگە 12 برەيك-پوينتتىڭ بەسەۋىن ءمۇلت جىبەرمەدى. قارسىلاسى 2 ەيس، 5 برەيكپەن (10 برەيك-پوينت) كوزگە ءتۇستى.
ەلەنا رىباكينا ءتورتىنشى اينالىمعا شىعۋ ءۇشىن رەيتينگىدە 74-ورىنداعى امەريكالىق تەيلور تاۋنسەندپەن تالاسادى. ول ەكىنشى اينالىمدا الەمنىڭ 28-راكەتكاسى، بەلگيالىق ەليزە مەرتەنستەن ايلاسىن اسىردى – 6:2، 6:2.
وتكەن جىلى وسى دودادا ە.رىباكينا فينالعا دەيىن جەتىپ، وندا چەحيالىق پەترا كۆيتوۆادان 6:7 (14:16)، 2:6 ەسەبىمەن ۇتىلىپ قالعان ەدى.