ەلەنا رىباكينا ينديان-ۋەللس ماستەرس ءتۋرنيرىنىڭ جارتىلاي فينالىنا شىقتى
قازاقستاننىڭ ءبىرىنشى، الەمنىڭ 10-راكەتكاسى ەلەنا رىباكينا اقش-تا ءوتىپ جاتقان ينديان-ۋەللس WTA 1000 ءتۋرنيرىنىڭ جارتىلاي فينالىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىق تەننيسشى شيرەك فينالدا الەمنىڭ 76-راكەتكاسى، چەحيالىق كارولينا مۋحوۆامەن وينادى.
قارسىلاستار وسىعان دەيىن 2019 جىلى اقش اشىق چەمپيوناتىندا كەزدەسىپ، وندا چەحيالىق سپورتشى 6:4، 6:4 ەسەبىمەن باسىم تۇسكەن ەدى.
بۇل جولى ءبىرىنشى پارتيادا ك.مۋحوۆا برەيك جاساپ، 4:2 ەسەبىمەن العا كەتتى. ءبىراق ول سەتكە دوپ بەرگەندە، ەلەنا تارازى باسىن تەڭەستىردى – 5:5. سوسىن تاي-برەيكتە ءساتتى ونەر كورسەتتى – 7:6 (7:4).
ەكىنشى سەتتى مۋحوۆا برەيكپەن باستادى – 2:0. سودان كەيىن تاعى ءبىر برەيكپەن ءبىتىردى – 6:2.
ءۇشىنشى، شەشۋشى پارتيادا ە.رىباكينا برەيكپەن العا كەتتى – 3:1. ەسەپ 5:3 بولعان مەزەتتە ەلەنا ەكى ماچبولدى پايدالانا المادى. دەگەنمەن ءوزى دوپ بەرگەندە، ەسەسىن جىبەرگەن جوق – 6:4.
ەكى ساعات 46 مينۋتقا سوزىلعان تارتىستى ماچ بارىسىندا قازاقستاندىق سپورتشى 6 ەيس جاساپ، 14 برەيك-پوينتتىڭ ەكەۋىن ءوز ەسەبىنە جازدى. قارسىلاسى 1 ەيس، 3 برەيكپەن (6 برەيك-پوينت) كوزگە ءتۇستى.
ەلەنا رىباكينا فينالعا شىعۋ ءۇشىن الەمنىڭ 1-راكەتكاسى، پولشا وكىلى يگا شۆەنتەك نەمەسە رەيتينگتە 83-ساتىداعى رۋمىنيالىق سورانا كىرستيانىڭ بىرەۋىمەن تالاسادى.
ەسكە سالا كەتەيىك، بۇدان بۇرىن ەلەنا رىباكينانىڭ ينديان-ۋەللس ماستەرس ءتۋرنيرىنىڭ شيرەك فينالىنا وتكەنىن جازعان بولاتىنبىز.