جاڭا ەكونوميكالىق ايماق
ۇكىمەت قاۋلىسىمەن 2048 جىلعا دەيىنگى كەزەڭگە الماتى وبلىسىندا اۋدانى 30 مىڭ گا G4 City ارنايى ەكونوميكالىق ايماعى (اەا) قۇرىلدى. بۇل تۋرالى Almaty-akshamy.kz ۇكىمەتتىڭ رەسمي سايتىنا سىلتەمە جاساپ حابارلايدى.
ەكونوميكالىق ايماق الماتى قالاسىنىڭ سولتۇستىگىندە، ۇزىندىعى 80 شاقىرىم ا3 تاس جولىنىڭ (الماتى - قونايەۆ) بويىندا ورنالاسقان، ونىڭ اۋماعىندا ارنايى قۇقىقتىق رەجيم بەلگىلەنەدى. جاڭا ەكونوميكالىق ايماق G4 City ينتەگراسيالانعان قالاسىن قۇرۋعا وتاندىق جانە شەتەلدىك ينۆەستيسيالاردى تارتۋ ءۇشىن قولايلى كليمات ۇسىنادى دەگەن جوسپار بار، بۇل ءوز كەزەگىندە بۇكىل ايماقتىڭ دامۋىنا جاڭا سەرپىن بەرەدى.
ماسەلەن، 2048 جىلعا دەيىن اەا شەڭبەرىندە شامامەن 3،7 ترلن تەڭگە كولەمىندە ينۆەستيسيا تارتۋ، قۇنى 17 ترلن تەڭگەدەن استام قىزمەتتەر مەن تاۋارلار ءوندىرۋ، سونداي-اق 60 مىڭعا جۋىق جۇمىس ورنىن قۇرۋ جوسپارلانىپ وتىر. جالپى، جاڭا ەكونوميكالىق ايماقتىڭ قىزمەتى G4 City-دە تۋريزم، مەديسينا، كولىك-لوگيستيكا، ءبىلىم بەرۋ جانە مادەني-دەمالىس سالالارى ينفراقۇرىلىمىنىڭ جەدەل دامۋىنا سەپتىگىن تيگىزەدى. سونىمەن قاتار، اەا رەجيمى نىسانداردى سالۋعا كەتەتىن نەگىزگى شىعىنداردى ازايتۋعا مۇمكىندىك بەرەدى.
ەسكە سالا كەتەيىك، پرەزيدەنت قاسىم-جومارت توقايەۆ الماتى وبلىسىنا جۇمىس ساپارى بارىسىندا G4 City جوباسىمەن تانىسقان بولاتىن. G4 City دامۋ تۇجىرىمداماسىنا سايكەس ينتەگراسيالانعان قالا ءتورت اۋداننان تۇرادى: Gate City – ىسكەرلىك جانە قارجىلىق ورتالىق، Golden District – ءبىلىم بەرۋ جانە مەديسينالىق حابى، Growing District – يننوۆاسيالىق-يندۋستريالىق جانە ساۋدا-لوگيستيكالىق ايماق، Green District – تۋريستىك كلاستەر. G4 City-دە شامامەن 2،2 ملن ادام تۇرادى دەپ بولجانىپ وتىر.
قاۋلى قول قويىلعان كۇنىنەن باستاپ كۇشىنە ەنەدى.