تاريف باعاسى ءبىر تەكشە مەتر گاز ءۇشىن 28،95 تەڭگەگە دەيىن تومەندەدى
الماتى وبلىسى پروكۋراتۋراسىنىڭ باستاماسىمەن شامالعان، جاندوسوۆ، شالقار، ەڭبەكشى، ۇشتەرەك، قۇمارال، تۇرار متف جانە اراي، ايانات، دارحان، باركول باۋ-باقشا قوعامدارىنىڭ تۇرعىندارىنا گاز ءتاريفى تومەندەتىلدى، دەپ حابارلايدى Almaty-akshamy.kz.
«جىل باسىنان بەرى جوعارىدا اتالعان ەلدى مەكەندەردىڭ تۇرعىندارىنا قىزمەت كورسەتەتىن «سيگما-گاز» جشس-گى» حالىق ءۇشىن تاۋارلىق گازدىڭ سالىستىرمالى تۇردە جوعارى تاريفىنە نارازىلىق بىلدىرگەن. وسىعان بايلانىستى، اۋدان پروكۋراتۋراسى تاۋارلىق گازدى وتكىزۋ بويىنشا قالىپتاسقان تاريفكە تالداۋ جۇرگىزدى، ناتيجەلەرى بويىنشا مونوپولياعا قارسى زاڭنامانىڭ بۇزىلعانى انىقتالدى. وعان الماتى وبلىسى بويىنشا تابيعي مونوپوليالاردى رەتتەۋ كوميتەتىنىڭ دەپارتامەنتى 2021 جىلدىڭ 12 قاراشاسىندا جول بەرگەن»،- دەپ حابارلادى وبلىستىق پروكۋراتۋرادان.
قاداعالاۋ ورگانى دەپارتامەنت باسشىنىڭ تاۋارلىق گازدى وتكىزۋ ءتاريفىن تابيعي گازدىڭ 1 تەكشە مەترىنە 37،5 تەڭگە جانە ءتاريفتى ۇلعايتۋ دەرەگى بويىنشا باعا ساراپتاماسىن جۇرگىزۋ بۇيرىعىنىڭ كۇشىن جويۋ تۋرالى قاداعالاۋ اكتىسىن ەنگىزدى. ناتيجەسىندە دەپارتامەنتتىڭ 10 ناۋرىزداعى №78-نق بۇيرىعىمەن «سيگما-گاز» ءجشس-نىڭ ءتاريفى بەكىتىلدى.
«وسى جىلدىڭ 1 ساۋىرىنەن باستاپ جوعارىدا اتالعان ەلدى مەكەندەر ءۇشىن قوسىلعان قۇن سالىعىن (ققس) ەسكەرە وتىرىپ تاريف باعاسى ءبىر تەكشە مەتر گاز ءۇشىن 28،95 تەڭگەگە دەيىن تومەندەدى. وسىلايشا الماتى وبلىسىنىڭ پروكۋراتۋراسى 9 918 تۇتىنۋشىنىڭ قۇقىعىن قورعاپ، قالپىنا كەلتىردى. «سيگما-گاز» ج ش س گازبەن جابدىقتاۋ ۇيىمى 2 ملن تەڭگەدەن استام سوماعا ايىپپۇل تۇرىندە اكىمشىلىك جاۋاپقا تارتىلدى»،- دەپ اتاپ ءوتتى ۆەدومستۆودان.