قازاقستاننىڭ ءبىرىنشى، الەمنىڭ 26-راكەتكاسى ەلەنا رىباكينا وستراۆا (چەحيا) WTA 500 ءتۋرنيرىنىڭ شيرەك فينالىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىق تەننيسشى ەكىنشى اينالىمدا الەمنىڭ 31-راكەتكاسى، بەلارۋس وكىلى الەكساندرا ساسنوۆيچپەن كەزدەستى.
وسىدان ءبىر جىل بۇرىن ە.رىباكينا ا.ءساسنوۆيچتى ەكى رەت ۇتقان ەدى.
بۇل جولى ءبىرىنشى پارتيادا ەسەپ 2:1 بولعان مەزەتتە قازاقستاندىق سپورتشى برەيك جاساعانىمەن، قارسىلاسى سول بويدا ەسە قايىردى.
تاي-برەيكتە ەلەنا 3:0 ەسەبىمەن العا شىققانىمەن، سول باسىمدىلىعىن ساقتاي المادى – 6:7 (5:7).
ەكىنشى سەتتە قازاقستاندىق سپورتشى 3:1 ەسەبىمەن العا كەتتى. وسى باسىمدىلىعىنان ايىرىلا قويعان جوق – 6:4.
ءۇشىنشى، شەشۋشى پارتيادا ەسەپ 4:3 بولعاندا، ساسنوۆيچ برەيك جاساپ كەتتى – 5:3. دەگەنمەن ول ماچقا دوپ بەرگەندە، رىباكينا قايىرا برەيك جاساي الدى.
سودان كەيىن جەڭىستىك بەرگەن جوق – 7:5.
ەكى ساعات 32 مينۋتقا سوزىلعان تارتىستى ماچتا رىباكينا 7 ەيس جاساپ، 9 برەيك-پوينتتىڭ تورتەۋىن پايدالاندى.
ە.رىباكينا جارتىلاي فينالعا شىعۋ ءۇشىن الەمنىڭ 20-راكەتكاسى، چەحيالىق پەترا كۆيتوۆامەن تالاسادى.
ول ەكىنشى اينالىمدا الەمنىڭ 4ء-ىنشى، وسى جارىستىڭ 2-راكەتكاسى، يسپانيالىق پاۋلا بادوسانى تىزە بۇكتىردى – 7:6 (7:4)، 6:4.
ەسكە سالا كەتەيىك، بۇدان بۇرىن الەمنىڭ ءتورتىنشى راكەتكاسى قازاقستاننىڭ تەننيس تۋرنيرلەرىن جوعارى دەڭگەيدە ۇيىمداستىراتىنىن ايتقانىن، Astana Open ATP 500 تۋرنيرىندە قازاقستاندىق جۇپتىڭ شيرەك فينالعا شىعا الماعانىن جازعان بولاتىنبىز.
سونداي-اق اننا دانيلينا چەحياداعى ءتۋرنيردىڭ جارتىلاي فينالىنا شىقتى.