قىزدار 10، 11 جانە 14 جاستا
الماتىدا 4 قازان ساباققا كەتىپ، سودان بەرى حابارسىز قالعان ءتورت قىز تابىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى جوعالعانداردى ىزدەۋمەن اينالىساتىن «ليدەر» ۆولونتەرلەر توبى ءمالىم ەتتى.
ولاردىڭ ايتۋىنشا، ءتورت جەتكىنشەكتى ىزدەۋ جۇمىسى كەشە تاڭعى ۇشكە دەيىن جالعاسقان. قىزدار 10، 11 جانە 14 جاستا. ونىڭ ەكەۋى - ءاپالى-سىڭلىلى باۋىرلار.
ەرىكتىلەر ناۋرىزباي اۋدانى پوليسيا قىزمەتكەرلەرىمەن بىرلەسىپ، «الما سيتي» تۇرعىن ءۇي كەشەنى مەن اباي اۋىلى توڭىرەگىن ءسۇزىپ شىققان. ويتكەنى جوعالعان قىزداردىڭ تەلەفونى شامامەن وسى ايماقتاردا قوسىلىپ-سوندىرىلگەن.
ىزدەۋ جۇمىسى سونىمەن قاتار تاراز قالاسىندا دا ءجۇردى. وندا ەرىكتىلەر قالاارالىق تاسىمالمەن اينالىساتىن اۆتوبۋستاردى توقتاتىپ، تەكسەرگەن. قىزدار باسقا قالاعا كەتىپ قالدى ما دەگەن كۇدىك بولعان.
ۇشتەن كەيىن قىزدار تابىلماعان سوڭ ەرىكتىلەر ۇيگە قايتقان.
تاڭعى التىدا ناۋرىزبايلىق پوليسەيلەردىڭ قىزداردى امان-ەسەن تاۋىپ، پوليسيا باسقارماسىنا جەتكىزگەنى بەلگىلى بولدى.