ەندى ءموبيلدى قۇرىلعىداعى QR كودتى پايدالانىپ تەكسەرۋدەن وتۋگە بولادى، دەپ حابارلايدى اlmaty-akshamy.kz.
23 ساۋىردەن باستاپ eGov.kz پورتالىندا ەلەكتروندىق سيفرلىق قولتاڭبانى (ەسق) الۋ ءۇشىن Digital ID بەينە تەكسەرۋى كومپيۋتەردىڭ كامەراسىن قولدانباي-اق قولجەتىمدى بولادى.
ەل تۇرعىندارى ءۇشىن ەسق-نى قاشىقتان الۋ پروسەسى بۇرىنعىدان دا قولجەتىمدى جانە ىڭعايلى بولدى. بەينە تەكسەرۋ سەرۆيسى - Digital ID پايدالانۋشىلارعا كومپيۋتەردە كامەرا بولماعان جاعدايدا نەمەسە جارامسىز بولعان كەزدە QR -كودتىڭ كومەگىمەن ەسق-نى قاشىقتان الۋ ءۇشىن سايكەستەندىرۋ راسىمىنەن وتۋگە مۇمكىندىگىن بەرەدى. جاڭا جاڭارتۋلار جەكە جانە زاڭدى تۇلعالار ءۇشىن قولجەتىمدى.
«ەسق الۋ – eGov.kz پورتالىندا وتە تانىمال سەرۆيس. تەك وسى جىلدىڭ وزىندە ونى 4،8 ملن رەت مەملەكەتتىك قىزمەتتەردى الۋ ءۇشىن جاساعان. بىزگە ازاماتتار كومپيۋتەردە كامەرا جوق نەمەسە جۇمىس ىستەمەيدى دەگەن شاعىمدارمەن كوپ كەلەدى. بۇل وزگەرىستەر ەسق-نى قاشىقتان الۋ پروسەسىن جەڭىلدەتەدى جانە ىڭعايلى ەتەدى»،- دەپ اتاپ ءوتتى «ۇلتتىق اقپاراتتىق تەحنولوگيالار» اق باسقارما ءتوراعاسى روستيسلاۆ كونياشكين.
جاڭارتۋلاردى پايدالانۋ ءۇشىن تەلەفون كامەراسىن كومپيۋتەر ەكرانىندا كورسەتىلگەن QR-كودىنا باعىتتاپ، بەينە تەكسەرۋدەن ءوتۋ كەرەك. سايكەستەندىرۋ ءساتتى راستالعاننان كەيىن ءوز كومپيۋتەرىڭىزدە ەسق الۋدىڭ ادەتتەگى ءتاسىلىن جالعاستىرۋ قاجەت.