الماتىدا باسپا ءسوز تۋرى بارىسىندا قالانى سۋ باسىپ قالۋعا قارسى شارالار تۋرالى ايتىلدى
سۋ باسۋ پروبلەماسىن شەشۋ ماقساتىندا الماتى اكىمىنىڭ تاپسىرماسى بويىنشا سۋ شارۋاشىلىعى وبەكتىلەرىنىڭ تەحنيكالىق جاعدايىنا تالداۋ جۇرگىزىلدى. نوسەر كارىزدەرىن، ونىڭ ىشىندە ارىقتار مەن كوللەكتورلاردى تەكسەرۋ ناتيجەلەرى باق-قا ارنالعان باسپا ءسوز تۋرى بارىسىندا كورسەتىلدى.
بارلىعى 56 ۋچاسكە انىقتالدى، ولاردى ازداعان جاۋىن-شاشىن كەزىندە ۇنەمى سۋ باسىپ قالادى. نەگىزگى سەبەپتەر - كەيبىر ۋچاسكەلەردە ارىق جەلىلەرىنىڭ بولماۋى، نوسەر كارىزىمەن قوسىلماعان ارىقتار، بۇزىلعان ارىقتار، ارىقتاردى جولدارعا شىعارۋ، سونداي-اق جۇمىس ىستەمەيتىن، بىتەلگەن، كومىلگەن كوللەكتورلار.
قالا شەكارالارىنىڭ ۇنەمى كەڭەيۋىنە جانە حالىقتىڭ وسۋىنە بايلانىستى اعىمداعى جۇيە جاڭبىر مەن ەرىگەن سۋدىڭ كولەمىنە توتەپ بەرە الماۋدا. ماسەلەنى شەشۋ ءۇشىن ارىق جەلىلەرى مەن كوللەكتورلاردىڭ وتكىزۋ قابىلەتىن ۇلعايتىپ، كەيىن ءبىرىڭعاي جەلىگە بىرىكتىرىپ، رەكونسترۋكسيالاۋ قاجەت.
تەكسەرۋ كورسەتكەندەي، جاۋىن جانە ەرىگەن سۋدى بۇرۋعا ارنالعان 16 كوللەكتوردىڭ تەك 4ء-ى الاتاۋ اۋدانىندا 2013-2018 جىلدار ارالىعىندا سالىنعان. قالعان 12ء-سى يەسىز جانە قىزمەت كورسەتىلمەيدى، قوقىسپەن جابىلعان جانە بىتەلگەن، بۇزىلعان، ارىق جەلىلەرىنە قوسىلماعان.
قالا اكىمىنىڭ تاپسىرماسى بويىنشا 2022 جىلدىڭ ناۋرىز ايىندا قالانىڭ ارىق جۇيەسىنە ينۆەنتاريزاسيا جۇرگىزىلدى. ناتيجەسىندە 1525 كم ارىق جەلىلەرى انىقتالدى، ولاردىڭ 1101 كم جۇمىس ىستەيدى، 424 كم (27%) جوندەۋدى نەمەسە رەكونسترۋكسيالاۋدى قاجەت ەتەدى، سونداي-اق ۇزىندىعى 100 كم جاڭا ارىق جەلىلەرىن سالۋ كەرەك.
اعىمداعى جىلى قالانىڭ جالپى ۇزىندىعى 376 كم ارىق جەلىسىن سالۋ جانە رەكونسترۋكسيالاۋ بويىنشا جۇمىستار باستالادى (باتىس بولىگى – الاتاۋ، ناۋرىزباي، اۋەزوۆ اۋداندارى، ورتالىق بولىگى – جەتىسۋ، بوستاندىق، المالى اۋداندارى، شىعىس بولىگى – مەدەۋ، تۇركسىب اۋداندارى).
بۇگىندە قالانىڭ باتىس بولىگىندە ۇزىندىعى 119 كم ارىق جەلىلەرىن سالۋ جانە رەكونسترۋكسيالاۋ بويىنشا قۇرىلىس-مونتاج جۇمىستارى جۇرگىزىلۋدە، ىسكە اسىرۋ مەرزىمى – 2021-2023 جج. بۇدان وزگە، وسى جوبامەن جەلىلەردى جاسىل ەكپەلەردى سۋارۋ ءۇشىن پايدالانۋ كوزدەلمەگەن، قولدانىستاعى كوللەكتورلارعا جاڭبىر جانە ەرىگەن سۋلاردى بۇرۋ ەسكەرىلمەگەن، ال بۇل جەكەلەگەن ۋچاسكەلەردى سۋ باسىپ قالۋعا اكەلگەن.
وسىعان وراي جوبانى قولدانىستاعى ارىق جەلىلەرى مەن كوللەكتورلاردىڭ وتكىزۋ قابىلەتىن ۇلعايتا وتىرىپ، ولاردى رەكونسترۋكسيالاۋدى ءارى قۇرىلىس جۇمىستارىن توقتاتپاي ءبىرىڭعاي جەلىگە قوسۋ جوسپارلانۋدا. بۇل سۋ باسۋدان ساقتايدى جانە جاسىل جەلەكتەردى سۋارۋعا مۇمكىندىك بەرەدى.