قازاقستاندىقتاردىڭ كوبى ەلەكترلى ساموكاتتارىن ساتىپ جاتىر.
وسى سالاداعى ساراپشى ماماندار بۇنى ءتارتىپتى قاتاڭداتۋمەن بايلانىستىرىپ وتىر. بيىل ءساۋىر مەن مامىر ارالىعىندا جەڭىل كولىك قۇرالدارىنىڭ دۇكەندەردەگى ساۋداسى 23 پايىزعا تومەندەگەن، دەپ حابارلايدى Almaty-akshamy.kz
2 اپتا بۇرىن ءماجىلىس ەلەكتر ساموكاتتاردىڭ قوزعالىسىن رەتتەيتىن جاڭا ءتارتىپتى قابىلادى. ەندى جاڭاشىلدىقتى سەنات ماقۇلداسا، تروتۋارلار ارقىلى ساموكات يەلەرى 6 كم/ساعات جىلدامدىقپەن عانا جۇرە الاتىن بولادى. ال كولىك اعىنىمەن ىلەسۋ ءۇشىن ارنايى شلەم مەن جارىق شاعىلىستىراتىن كيىم كيۋ مىندەتتەلەدى. تاعى جۇرگىزۋشى كۋالىگى دە بولۋ تالاپ ەتىلەدى.
24.kz اقپاراتىنا جۇگىنسەك، جەلمەن جارىسا جۇيىتكەيتىن ساموكاتشىلاردى تارتىپكە كەلتىرەتىن جاڭاشىلدىق تۇرتكى بولدى ما بەلگىسىز، ايتەۋىر ساراپشىلار ونلاين جارناما سەرۆيستەرىندە وسى كولىك ءتۇرىنىڭ ساتىلىپ كوبەيگەنىن اڭعارعان. تاۋار قۇنى دا 5%-عا قىمباتتاپتى. سۋ جاڭا ەلەكتروساموكاتتىڭ ورتاشا باعاسى 140 مىڭ تەڭگە تۇرادى. قولدان الساڭىز 30 مىڭعا ارزان شىعادى. ءبىراق، تاۋارعا دەگەن سۇرانىس تومەن دەيدى ساراپشىلار.
«بۇنىڭ باستى سەبەبى – جاڭا زاڭ جوباسى دەپ ەسەپتەيمىن. سەبەبى، كوپتەگەن ادامدار ەلەكتر ساموكاتتارعا قاتىستى جاڭالىقتى ب ا ق بەتتەرىنەن وقىپ الىپ، جاڭاشىلدىق كۇشىنە ەندى دەپ ويلاۋدا. سوندىقتان ولار بۇل كولىك ءتۇرىن پايدالانۋدىڭ تيىمدىلىگى جوق دەگەن پىكىر قالىپتاستىرعان»، - دەيدى ساراپشى ءانۋار ءجۇسىپوۆ.
ال كارشەرينگتىك كومپانيانىڭ نەگىزىن قالاۋشى مەيرامبەك ءابىلقاسوۆ بۇعان جاڭا زاڭ جوباسىنىڭ تۇك قاتىسى جوق دەگەن ويدا. ونىڭ ايتۋىنشا، حالىق جالعا الۋ ادەتىنە كوشە باستاعان.
«ءقازىر ءسىز 300-400 دوللارعا ءبىر ءوزىڭىز عانا ءمىنۋ ءۇشىن ەلەكترو ساموكات الاسىز. ونى ءاردايىم قۋاتتاپ وتىرۋ قاجەت. ساقتايتىن ورىن كەرەك. سىنىپ قالسا، جوندەۋگە قوسىمشا اقشا قاجەت. ال ۋاقىتشا جالعا الاتىن بولساڭىز بۇنىڭ بارلىعىنا باس قاتىرمايتىن بولاسىز»، - دەيدى كارشەرينگتىك كومپانيانىڭ نەگىزىن قالاۋشىمەيرامبەك ءابىلقاسوۆ.
ءقازىر ەلەكترو ساموكاتتار نارىعىندا ءىرى 4 كومپانيا جۇمىس ىستەيدى. ەندى بۇل بيزنەس جاڭا تارتىپكە باعىنا ما دەگەن ورىندى سۇراق تۋىندايدى.
«مەنىڭ ويىمشا بۇل زاڭ وسى كولىك ءتۇرىن پايدالانۋعا تىيىم سالۋعا باعىتتالعان. جاڭا ءتارتىپتىڭ سالدارىنان بيزنەس ءبىراز زارداپ شەگەدى. ال شەرينگكە كەلەر بولساق، بۇل نارىق قازاقستاندا جابىلادى دەپ ويلايمىن. سەبەبى، 1 مىڭنان استام ادام جۇمىسسىز قالادى. ياعني، وسى ساموكاتتاردى پايدالاناتىن كۋرەرلەر ارزان كولىكتەن قاعىلادى. سوندىقتان سەنات بۇل زاڭ جوباسىن مۇقيات زەرتتەپ، ەشكىم زارداپ شەكپەيتىندەي شەشىم قابىلداۋى ءتيىس»، - دەيدى ساراپشى ءانۋار ءجۇسىپوۆ.
ايتا كەتكەن ءجون، ءقازىر پارلامەنت قابىرعاسىندا جىلدامدىعى ساعاتىنا 50 كم-دەن اساتىن ەلەكترو ساموكاتتاردىڭ ەلگە اكەلۋگە تىيىم سالۋ مەن شەكتەۋ جاعى قاراستىرىلۋدا. دەمەك، بۇل نارىقتا الداعى ۋاقىتتا تۇبەگەيلى وزگەرىستەر بولادى.