ق ر پرەمەر-مينيسترى ءاليحان سمايىلوۆتىڭ توراعالىعىمەن مەملەكەت باسشىسىنىڭ تاپسىرماسىن ىسكە اسىرۋ جونىندەگى رەسپۋبليكالىق شتاب وتىرىسى ءوتتى.
وتىرىس بارىسىندا 7 جىلدا 111 ملن شارشى مەتر تۇرعىن ءۇي سالىنعانى ءمالىم بولدى دەپ حابارلايدى Almaty-akshamy.kz.
پرەمەر-مينيستر مەملەكەت باسشىسى 2029 جىلعا دەيىن 111 ملن شارشى مەتر جاڭا تۇرعىن ءۇي سالۋ تۋرالى مىندەت قويعانىن اتاپ ءوتتى. اتاپ ايتقاندا، وتكەن جىلى 130 مىڭنان استام وتباسى باسپانا جاعدايىن جاقسارتا الدى. «بۇل رەتتە، جوسپار اسىرا ورىندالعان وڭىرلەردىڭ ىشىندە استانا، الماتى قالالارىن جانە الماتى وبلىسىن اتاپ وتۋگە بولادى. ءوز كەزەگىندە، ۇلىتاۋ، سولتۇستىك قازاقستان جانە اتىراۋ وبلىستارىندا جوسپار ورىندالماي قالدى»، - دەدى ءاليحان سمايىلوۆ.
ول بيىلعى 4 ايدىڭ قورىتىندىسى بويىنشا اباي، ماڭعىستاۋ جانە ۇلىتاۋ وبلىستارى جوسپاردان ارتتا قالىپ كەلە جاتقانىن اتاپ ءوتتى.
«باسپانامەن قامتاماسىز ەتۋ ماسەلەسىنىڭ اسىرەسە، حالىقتىڭ الەۋمەتتىك وسال توپتارى ءۇشىن ماڭىزى وتە زور. بۇل ەلىمىزدىڭ ءىرى قالالارىندا بارىنشا وزەكتى بولىپ وتىر. بۇگىندە 600 مىڭنان استام وتباسى تۇرعىن ۇيگە مۇقتاج جانداردىڭ ەسەبىندە تۇر. اتالعان ماسەلەنى بىرتىندەپ، جۇيەلى تۇردە شەشۋ كەرەك. بىزدە تۇرعىن ۇي-كوممۋنالدىق ينفراقۇرىلىمدى دامىتۋ تۇجىرىمداماسى شەڭبەرىندە ءبىرقاتار باعىتتار كوزدەلگەن»، - دەدى پرەمەر-مينيستر.
ءاليحان سمايىلوۆ سونداي-اق كەيىنگى ۋاقىتتا حالىقتىڭ تاراپىنان قۇرىلىس جۇمىستارىنىڭ ساپاسىنا جانە ولاردىڭ رەتسىز، بەي-بەرەكەت سالىنۋىنا، وبەكتىلەردىڭ ۋاقتىلى ىسكە قوسىلماۋىنا قاتىستى وتە كوپ شاعىم تۇسكەنىن ايتتى.
«ماسەلەن، استانادا «بۋداپەشت» تۇرعىن ءۇي كەشەنىنىڭ تۇرعىندارى بىلتىر قىس باستالاردىڭ الدىندا جىلۋسىز قالدى. شىمكەنتتە وسىدان بەس جىل بۇرىن عانا مەملەكەتتىك باعدارلامامەن سالىنعان كوپپاتەرلى تۇرعىن ءۇيدىڭ قابىرعالارى جارىلىپ، ليفتىلەر ءجيى ىستەن شىعادى. الماتىدا تاۋلى جەرلەردە، سۋعا جاقىن ماڭداردا جانە ەرەكشە قورعالاتىن اۋماقتاردا قۇرىلىس سالۋ كەزىندە زاڭنامانى بۇزۋدىڭ 150-دەن استام فاكتىسى انىقتالدى»، - دەپ اتاپ ءوتتى پرەمەر-مينيستر.
قورىتىندىلاي كەلە، ول تۇرعىن ءۇي جانە ينجەنەرلىك ينفراقۇرىلىمدى ىسكە قوسۋ بويىنشا وسى جىلعا ارنالعان بارلىق جوسپارلاردىڭ تولىق جانە ۋاقتىلى ورىندالۋىن قامتاماسىز ەتىپ، جوعارىدا ايتىلعان كەمشىلىكتەردى ەسكەرۋ قاجەتتىگىن اتاپ ءوتتى. سونىمەن قاتار پرەمەر-مينيستر ءبىر اي مەرزىمدە كەزەكتە تۇرعاندار ءۇشىن ءۇي بولە وتىرىپ، كەشەندى قۇرىلىس سالۋدى قارجىلاندىرۋ مەحانيزمىن ىسكە قوسۋ بويىنشا شارالار قابىلداۋدى، جانە 1 قىركۇيەككە دەيىن كەزەكتە تۇرعانداردىڭ ءتىزىمىن بەلگىلەنگەن تالاپتارعا سايكەستىگى تۇرعىسىنان وزەكتەندىرۋدى تاپسىردى.