باتىس قازاقستان وبلىسى شىڭعىرلاۋ اۋدانىندا ەلەك وزەنىندەگى سۋ دەڭگەيى ءقاۋىپتى دەڭگەيدەن اسىپ كەتتى.
«قازگيدرومەت» رمك بقو فيليالىنىڭ ديرەكتورى تىلەگەن شاپانوۆتىڭ ءمالىم ەتكەنىندەي، وزەننىڭ سۋى شىلىك گيدرولوگيالىق بەكەتىندە ءبىر تاۋلىك ىشىندە 186 سانتيمەترگە كوتەرىلىپ، 785 سانتيمەترگە (ءقاۋىپتى دەڭگەي – 750 سم) جەتتى، دەپ حابارلايدى Almaty-akshamy.kz.
«رەسەيدىڭ ورىنبور وبلىسى جاعىنان سۋ كەلىپ جاتىر. سۋ دەڭگەيى 800 سانتيمەتردەن اسقان جاعدايدا اۋداننىڭ وزەن بويىندا ورنالاسقان ەلدى مەكەندەرىنە ءقاۋىپ ءتونۋى ىقتيمال»، - دەدى ت.شاپانوۆ.
«قازگيدرومەت» رمك بقو فيليالىنىڭ مالىمەتى بويىنشا جايىق وزەنىندەگى سۋ دەڭگەيى ءبىر تاۋلىك ىشىندە ورال قالاسى تۇسىندا 84 سانتيمەترگە كوتەرىلىپ، 457 سانتيمەترگە (ءقاۋىپتى دەڭگەي – 850 سم) جەتتى.
شاعان وزەنى چۋۆاشين اۋىلى تۇسىندا 1211 (ءقاۋىپتى دەڭگەي – 1280-1300 سم)، دەركول بەلەس ماڭىندا 670 (600-650)، قاراوزەن جالپاقتالدا 756 (790-820) سانتيمەتردى كورسەتتى.
شىڭعىرلاۋ اۋدانىنىڭ اكىمى مۇرات ومىرالييەۆ جاعدايدىڭ باقىلاۋدا ەكەندىگىن جەتكىزدى.
«ەلەك وزەنىنىڭ سۋى ءوتىپ جاتىر. ازىرگە ەلدى مەكەندەرگە ءقاۋىپ ءتونىپ تۇرعان جوق»، - دەدى م.ومىرالييەۆ.