توكيو وليمپياداسىنىڭ قولا جۇلدەگەرى ەلدوس سمەتوۆ سپورتتان كەتپەيدى. بۇل جاقسى جاڭالىقتى داڭقتى سپورتشى الەۋمەتتىك جەلىدەگى پاراقشاسىندا مالىمدەدى.
«ەگەر سپورتتى ودان ءارى جالعاستىرىپ، 2024 جىلعى پاريج وليمپياداسىنا قاتىساتىن بولسام، مىندەتتى تۇردە 66 كەلىگە اۋىسامىن. بۇل تۋرالى ەلگە ورالعان بويدا ايتقان ەدىم. ءبارى دە جاراقاتىما بايلانىستى بولىپ تۇر.
ەگەر دەنساۋلىعىم جاراپ، جاراقاتتارىم مازالاماسا، مىندەتتى تۇردە كۇرەسەمىن. ويتكەنى، كۇرەس – مەنىڭ ءومىرىم. مەن سپورتتان ءلاززات الامىن. ەلىمىزدىڭ تۋىن جەلبىرەتۋ ءۇشىن جۇمىس ىستەيمىن. وليمپيادا اياقتالدى، جاراقاتتارىمدى ەمدەپ باستايمىن. ءبارى دە جاقىن ارادا بەلگىلى بولادى»، – دەپ جازدى ە.سمەتوۆ.
ەستەرىڭىزدە بولسا، ريو جانە توكيو وليمپيادالارىنا ەلدوس 60 كەلى سالماق دارەجەسىندە قاتىسىپ، كۇمىس جانە قولا جۇلدە جەڭىپ الدى. ول دزيۋدو كۇرەسىنەن قوس وليمپيادانىڭ جۇلدەسىن جەڭىپ العان العاشقى قازاق سپورتشىسى بولىپ وتىر. ال 66 كەلى سالماق دارەجەسىندە بيىلعى وليمپياداعا ەرجان سەرىكجانوۆ قاتىسىپ، ۇلكەن تابىسقا جەتە المادى.
جالپى، توكيو جۇلدەسىن جەڭىپ العان ە.سمەتوۆكە عانا ەمەس، جىل بويعى جارىستاردا ەل نامىسىن ابىرويمەن قورعاعان سپورتشىلاردىڭ بارىنە قازاقستان دزيۋدو فەدەراسياسى جاقىندا نۇر-سۇلتان جانە الماتى قالالارىندا ۇلكەن قۇرمەت كورسەتتى. قازاقستان دزيۋدو فەدەراسياسىنىڭ پرەزيدەنتى قايرات قوجامجاروۆ سپورتشىلار مەن جاتتىقتىرۋشىلار، ۇلتتىق قۇرامانىڭ عىلىمي-كەشەندى توپ وكىلدەرىنە اقشالاي سىياقى تاعايىندادى. وليمپيادا جۇلدەگەرى ە.سمەتوۆ 5 ملن. تەڭگەنىڭ سەرتيفيكاتىنا يە بولدى.
«ءبىز بۇگىن جىلدىڭ ەڭ ماڭىزدى دوداسى سانالعان وليمپيادانى قورىتىندىلاپ وتىرمىز. توكيو تورىندە ءبىزدىڭ ماقتانىشىمىز ەلدوس سمەتوۆ وتە ناتيجەلى كۇرەس كورسەتىپ، ەل قورجىنىنا قولا جۇلدە سالدى. بۇل ءبىز ءۇشىن، قازاقستان دزيۋدوسى ءۇشىن تاريحي جۇلدە بولىپ سانالادى. ەلدوس – دزيۋدودان وليمپيادانىڭ ەكى دۇركىن جۇلدەگەرى اتانعان تۇڭعىش قازاقستاندىق سپورتشى. جاراقاتتارىنا قاراماستان ول ءوزىنىڭ الەمدىك دارەجەدەگى مىقتى سپورتشى ەكەنىن تاعى ءبىر رەت دالەلدەدى»، – دەدى ق.قوجامجاروۆ.
«قازاقستان دزيۋدوسى ءۇشىن بيىلعى جىلدى جامان بولدى دەۋگە بولمايدى. پاندەمياعا جانە كەزدەسكەن قيىندىقتار مەن شەكتەۋلەرگە قاراماستان ۇلتتىق قۇراما سپورتشىلارى قاتىسقان ماڭىزدى جارىستاردان جۇلدەسىز ورالعان جوق. ماسەلەن، الەم چەمپيوناتىنان عۇسمان قىرعىزبايەۆتىڭ كۇمىس جۇلدەسىن، ەلدوس جۇماقانوۆتىڭ ازيا چەمپيوناتىنداعى قولا جۇلدەسىن ايتۋعا بولادى. قىزدارىمىز دا بيىل جۇلدەدەن قالىس قالعان جوق. ءابيبا ءابۋجاقىنوۆا ايەلدەر اراسىندا ازيا چەمپيوناتىنىڭ كۇمىس جۇلدەسىن يەلەنسە، سيەۆارا نىشانبايەۆا قولا مەدال جەڭىپ الىپ، ۇزدىك ۇشتىككە ەندى»، – دەدى فەدەراسيا پرەزيدەنتى.
الماتى قالاسىندا وتكەن جيىندا وسى سپورتشىلاردىڭ بارلىعىنا جانە كوزگە تۇسكەن جاتتىقتىرۋشىلارعا اقشالاي سىياقى تابىس ەتىلدى.