مەملەكەت باسشىسى امانكەلدى سەيىتحاننىڭ وتباسىنا كوڭىل ايتتى

بەلگىلى سپورت كوممەنتاتورى، اقپارات سالاسىنىڭ ۇزدىگى امانكەلدى سەيىتحان كەشە، 52 جاسىندا دۇنيەدەن وزدى.

قازاقستان پرەزيدەنتى قاسىم-جومارت كەمەل ۇلى بەلگىلى جۋرناليست امانكەلدى سەيىتحاننىڭ وتباسى مەن جاقىن تۋىستارىنا كوڭىل ايتتى دەپ حابارلايدى Almaty-akshamy.kz 
بۇل تۋرالى مەملەكەت باسشىسىنىڭ باسپا ءسوز حاتشىسى بەرىك ءۋالي حابارلادى.

«بەلگىلى جۋرناليست، سپورت كوممەنتاتورى امانكەلدى سەيىتحاننىڭ دۇنيەدەن وتۋىنە بايلانىستى اۋىر قايعىعا ورتاقتاسىپ، كوڭىل ايتامىن. امانكەلدى مۋاتقان ۇلى قازاق سپورت جۋرناليستيكاسىنىڭ دامۋىنا ولشەۋسىز ۇلەس قوستى. ونىڭ ەسىمى ەل ەسىندە ماڭگى ساقتالىپ، قازاق تەليەۆيزياسىنىڭ تاريحىنا التىن ارىپتەرمەن جازىلارىنا سەنىمدىمىن. مارقۇمنىڭ الدى پەيىش، ارتى كەنىش بولسىن» - دەپ جازىلعان پرەزيدەنتتىڭ كوڭىل ايتۋ جەدەلحاتىندا.

كورەرمەننىڭ كوڭىلىندە «جەڭىستى كۇندەردە جولىققانشا» دەگەن سوزىمەن جاتتالىپ قالعان سپورت كوممەنتاتورى، قازاق تەليەۆيزياسىنىڭ ارداگەرى، امانكەلدى سەيىتحان 52 جاستا ەدى. ول 1969 جىلى 11 مامىردا شىعىس قازاقستان وبلىسى ماقانشى اۋدانىندا دۇنيەگە كەلگەن.