ەكىنشى ورتا سالماقتاعى بوكسشى ايدوس ەربوسىن ۇلىنىڭ (15-0، 10كو) جاڭا قارسىلاسى انىقتالدى.
بيىلعى 17 ساۋىردە ايدوس IBF نۇسقاسى بويىنشا الەم چەمپيونى اتاعىنا مىندەتتى ۇمىتكەر اتانۋ ءۇشىن رەسەيلىك ەۆگەنيي شۆەدەنكومەن (15-0، 6كو) كەزدەسۋگە ءتيىس ەدى. گەرمانيانىڭ كارلسرۋە قالاسىندا وتۋگە ءتيىس جەكپە-جەككە ءبىر اپتا قالعاندا ايدوستىڭ كوروناۆيرۋس جۇقتىرىپ العانى بەلگىلى بولدى. ءسويتىپ، كەزدەسۋ مۇلدە وتپەيتىنى ايتىلدى.
سودان كەيىن ا.ەربوسىن ۇلى ەلگە كەلىپ ەمدەلىپ، ابدەن ساقايدى. Boxingscene.com سايتىنىڭ اقپاراتى بويىنشا، ەربوسىن ۇلى 12 قىركۇيەك كۇنى گايانالىق بوكسشى اللەن لەننوكسپەن (22-1-1، 14كو) كەزدەسەدى. بۇل جەكپە-جەكتە ەكىنشى ورتا سالماق دارەجەسى بويىنشا WBA نۇسقاسىنداعى الەم چەمپيونى اتاعىنا مىندەتتى ۇمىتكەر انىقتالادى. جارىستىڭ وتەتىن جەرى ازىرشە بەلگىلى ەمەس.
بۇل كۇندەرى ايدوس ماسكەۋ (رەسەي) قالاسىندا وقۋ-جاتتىعۋ جيىنىن وتكىزىپ جاتىر. الەۋمەتتىك جەلىدەگى پاراقشاسىنا ول وسىندا ءبىراز جاتتىعاتىنىن، جاقىن ۋاقىتتا جاڭالىق ايتاتىنىن جازدى.
ا.ەربوسىن ۇلى 2020 جىلدىڭ جەلتوقسانىنان بەرى شارشى الاڭعا شىققان جوق. سول كەزدە ول نۇر-سۇلتان قالاسىندا گانالىق يسا ءساميردى ەستەن تاندىرىپ، ەكىنشى ورتا سالماقتاعى WBC Asia، WBA International جانە WBO Global اتاقتارىن ءساتتى قورعاعان بولاتىن.
ال بىلتىرعى جەلتوقساندا IBO نۇسقاسى بويىنشا الەم چەمپيونى اتاعىنا تالاسىپ، 12 راۋندتىق جەكپە-جەكتە جكۆادورلىق كارلوس گونگورادان نوكاۋتپەن جەڭىلگەن وتانداسىمىز ءالي احمەدوۆ تە (16-1، 12كو) جاقىندا شارشى الاڭعا ورالادى. BoxRec پورتالىنىڭ حابارلاۋىنشا، احمەدوۆ 26 تامىزدا كوستا-مەسا قالاسىندا (كاليفورنيا شتاتى، اقش) مەكسيكالىق ريكاردو ادريانو فلورەسپەن (23-8-1، 15 كو) جۇدىرىقتاسادى. جەكپە-جەك 8 راۋندقا جوسپارلانىپ وتىر.
اراعا 20 كۇن سالىپ ءا.احمەدوۆ ورتاعا قايتا شىعادى. 16 ساۋىردە ول كاليفورنيا شتاتىنداعى مونتەبەللو قالاسىندا پەرۋلىك داۆيد سەگاررامەن (34-5، 21كو) 10 راۋندتىق جەكپە-جەكتە قولعاپ تۇيىستىرەدى. ەكى سپورتشى 1 تامىزدا البۋكەركە قالاسىندا (نيۋ-مەحيكو شتاتى، اقش) جولىعۋعا ءتيىس ەدى. الايدا، د. سەگاررانىڭ كوروناۆيرۋسقا تاپسىرعان تەستى وڭ ناتيجە بەرىپ، جەكپە-جەك كەيىنگى ىسىرىلدى.