ەرتەڭ استانادا«Qazaqstan Barysy Grand Slam» ءتۋرنيرى باستالادى.
ب ا ق وكىلدەرىنىڭ قاتىسۋىمەن وتكەن بريفينگىدە قازاقستان دزيۋدو فەدەراسياسىنىڭ باس حاتشىسى اسحات جىتكەيەۆ ەلدوس سمەتوۆتىڭ «Qazaqstan Barysy Grand Slam» تۋرنيرىنە نەگە قاتىسپايتىنىن ايتتى، دەپ حابارلايدى Almaty-akshamy.kz.
«وزدەرىڭىز بىلەتىندەي، ەلدوس سمەتوۆ تاشكەنت قالاسىندا كۇرەسكەن ۋاقىتتا جاراقات العان بولاتىن. كەيىن جىلدىڭ اياعىندا ماستەرس تۋرنيرىندە كۇرەسكەندە قايتا جاراقات الدى. بيىلدان باستاپ فەدەراسيانىڭ قولداۋىمەن ەلدوس سمەتوۆ ەم الىپ جاتىر. بۇعان دەيىن پاريجدە، ءقازىر ەلىمىزدە ەمدەلىپ جاتىر. ول جەكە جوسپارى بويىنشا الماتىدا دايىندالىپ جاتىر. كوپشىلىك «ەلدوس نەگە كۇرەسپەيدى؟» دەپ سۇراپ جاتىر. ول بۇل جارىسقا قاتىسپاعانىمەن، قۇرامامەن بىرگە. ول تامىز ايىندا وتەتىن ماستەرس تۋرنيرىنە دايىندالىپ جاتىر»، - دەپ توقتالدى اسحات جىتكەيەۆ.
فەدەراسياسىنىڭ باس حاتشىسى ەلدوس سمەتوۆ كەلەر جىلى پاريجدە وتەتىن وليمپيادا ويىندارىنا قاتىسىپ، چەمپيون اتانۋى مۇمكىن دەپ بولجام جاسادى.
حالىقارالىق دوداعا ءابيبا ءابۋجاقىنوۆا دا قاتىسپاايتىن بولدى، بۇل تۋرالى قازاقستان دزيۋدو فەدەراسياسى حابارلادى.
رەسمي مالىمدەمەگە سايكەس ءابيبا كوماندانىڭ مەديسينا ماماندارىنىڭ ۇسىنىسى بويىنشا اتالعان جارىستان تىس قالىپ وتىر.
«تاشكەنتتە وتكەن الەم چەمپيوناتىندا العان جاراقاتىنان (يىعى) تولىق ايىققان جوق. جاراقاتىمەن كۇرەسسە، ونى اسقىندىرىپ الۋ ءقاۋپى بولعاندىقتان، ءابيبانى الەمدىك جارىسقا قاتىستىرماۋ تۋرالى شەشىم قابىلداندى»، دەپ حابارلادى ۆەدومستۆودان.
ءا.ءابۋجاقىنوۆا تاشكەنتتەگى الەم چەمپيوناتىندا جارتىلاي فينالدا جانە قولا جۇلدە ءۇشىن باسەكەدە قارسىلاستارىنا جول بەرىپ، بەسىنشى ورىنمەن شەكتەلگەن بولاتىن. ال وتكەن جىلى الەم بىرىنشىلىگىندە قازاق قىزدارى اراسىنان تۇڭعىش رەت قولا جۇلدەگەر اتانعان ەدى.