شارۋالاردى زاماناۋي سۋ ۇنەمدەۋ تەحنولوگيالارىن قولدانۋعا ىنتالاندىرۋ ءۇشىن مەملەكەتتىك قولداۋ شارالارى كوزدەلگەن.
بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ايتىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سۋارمالى ەگىنشىلىكتى دامىتۋ سۋارۋدىڭ سۋ ۇنەمدەۋ تەحنولوگيالارىن كەڭىنەن ەنگىزۋ ارقىلى قامتاماسىز ەتىلەدى. ماسەلەن، شارۋالاردى زاماناۋي سۋ ۇنەمدەۋ تەحنولوگيالارىن قولدانۋعا ىنتالاندىرۋ ماقساتىندا زاماناۋي سۋارۋ جۇيەسىن ساتىپ الۋعا جانە قاجەتتى بۇكىل ينفراقۇرىلىمدى جۇرگىزۋگە جۇمسالعان شىعىنداردىڭ 50% وتەۋدى كوزدەيتىن ينۆەستيسيالىق سۋبسيديالاۋ تۇرىندەگى مەملەكەتتىك قولداۋ بار. بۇل ماقساتتار ءۇشىن وبلىستاردىڭ وتىنىمدەرى بويىنشا بيىل 268 جوبانى ىسكە اسىرىلادى، وعان 16،6 ملرد تەڭگە كوزدەلگەن»، - دەدى اۋىل شارۋاشىلىعى ءمينيسترى ۇكىمەتتىڭ بۇگىنگى وتىرىسىندا.
سونداي-اق اۋىل شارۋاشىلىعى تاۋارىن وندىرۋشىلەرگە سۋ بەرۋ قىزمەتىنىڭ قۇنى سۋبسيديالانىپ جاتىر. وندا سۋدىڭ ءبىر تەكشە مەترىنە بولىنەتىن سۋبسيديا مولشەرى تاريفتەردەن پايىزدىق قاتىناستا 50%-دان 80%-عا دەيىن ارزانداتىلادى. بۇل ماقساتقا 2،7 ملرد تەڭگە كوزدەلگەن.
«فەرمەرلەردى سۋ ۇنەمدەۋ تەحنولوگياسىن ەنگىزۋگە ىنتالاندىرۋ ءۇشىن ءقازىر سۋ بەرۋ قىزمەتىن وتەۋ جونىندەگى سۋبسيديانى سۋارۋ تاسىلدەرىنە قاراي سارالاۋ جۇمىسى ءجۇرىپ جاتىر. ياعني بۇرىنعى دەڭگەيدەگى سۋبسيديانى سۋ ۇنەمدەۋ تەحنولوگياسىن قولداناتىن فەرمەرلەر عانا الادى»، - دەدى ەربول قاراشوكەيەۆ.